काठमाडौं । प्रधानमन्त्री केपी शर्मा ओलीले इस्लामिक गणतन्त्र पाकिस्तानको प्रधानमन्त्रीमा इमरान अहमद खान नियाजीे उच्चपदमा नियुक्त भएकोमा हार्दिक बधाई ज्ञापन गरेका छन् । 

 

प्रधानमन्त्री ओलीले आफ्ना पाकिस्तानी समकक्षी खानलाई शनिबार पठाएको बधाई सन्देशमा नेपाल र पाकिस्तानबीचको मैत्रीपूर्ण सम्बन्धको स्मरण गर्दै नवनिर्वा्चित प्रधानमन्त्रीको सफल कार्यकालका निम्ति हार्दिक शुभकामना व्यक्त गरेका छन् । पाकिस्तानका प्रधानमन्त्रीले शनिबार नै पद तथा गोपनीयताको शपथ लिएका हुन् । 

यसैगरी दक्षिण एसियाली क्षेत्रीय सहयोग सङ्गठन (सार्क) का महासचिव अमजद हुसेन बी सियालले प्रधानमन्त्रीमा इमरान अहमद खान नियाजी नियुक्त भएकोमा हार्दिक बधाई ज्ञापन गरेका छन् । प्रधानमन्त्री खानलाई महासचिव सियालले शनिबार पठाएको बधाई सन्देशमा उनको उच्च पदमा भएको नियुक्तिले पाकिस्तानी जनताको निष्ठा र विश्वास प्रतिविम्बित गरेको बताएका छन् । 

 

सार्कको स्थापनादेखि नै दक्षिण एसियामा क्षेत्रीय सहयोग सुदृढ तुल्याउन पाकिस्तानले उल्लेखनीय योगदान गरेको बताउँदै सन्देशमा उनले सार्क मुलुकका जनताको कल्याणका लागि काम गर्नु सङ्गठनको मूल उद्देश्यमा पाकिस्तानले प्रशंसनीय योगदान गरेको उल्लेख गरे । 

सार्कको १९ औँ शिखर सम्मेलन यथाशीघ्र इस्लामावादमा आयोजना गर्न उपयुक्त वातावरण बन्नेमा आफू विश्वस्त रहेको महासचिव सियालले बताए ।