कात्तिक ३ । अर्घाखाँची जिल्लाको धनचौर गाविस ५ की कल्पना भुसालको हत्या आरोपमा खेमराज भुसाल र उनका छोरा गणेश भुसाल पक्राउ परेका हुन् । दुई जनालाई बुधबार जिल्ला प्रहरी कार्यलय अर्घाखाँचीले सार्वजनिक गरेको हो । धनचौर गाविस–५ का ५९ वर्षका बुवा खेमराज भुसाल र ३५ वर्षका गणेश भुसाललाई प्रमुख जिल्ला अधिकारी कृष्णबहादुर कटुवालको उपस्थितिमा प्रहरीले पत्रकार सम्मेलन गरी सार्वजनिक गरेको हो । असोज १८ गते बेलुकादेखि हराएकी कल्पनाको हत्या अभियोगमा गणेश र खेमराजलाई अनुसन्धानका लागि हिरासतमा लिएको र अहिले पनि अनुसन्धान भइरहेको प्रहरीले बताएको छ । गणेशले कल्पनाको हत्या गरि झिम्रुक नदीमा फालेको स्वीकार गरेको प्रहरीले जनाएको छ । प्रहरीले उनीहरुलाई थुनामा राखेर अनुसन्धान गरिरहेको छ । अभियुक्त गणेस भुसालले आफूले सुनियोजित भन्दा पनि रिसको झोकमा उनलाई हानेको र झुक्किएर ज्यान गएको तथा उनको र आफ्नो लामो समयसम्म सम्बन्ध रहेको बताए । घटना घटिसके पछि बुवाको समेत सहयोगमा झिमरुक नदीमा लगेर फालेको पत्रकार सम्मेलनमा उनी आफैले बताएका छन् । धनचौर–५ की ३४ वर्षकी कल्पना भुसाल असोज १८ गते देउराली स्थित रुद्र किराना पसलबाट दसैँको लागि सामान र खुल्ला पैसा लिइ घर तर्फ गएकी थिइन् तर उनी बिच बाटोबाटै हराइन् । स्थानीय बासिन्दाले उनको खोजी गरे तर कतै नभेटाएपछि उनकी बहिनी चन्दा खनालले दिदीको खोजी गरिदिन भन्दै प्रहरीमा उजुरी गरेकी हुन् । प्रहरीले खोजी कार्य जारी राखेको छ । उनका दुई छोराछोरी रहेका छन् ।

argakhanchi hatya garne pakrau