संघीय समाजवादी फोरम नेपालका अध्यक्ष उपेन्द्र यादवले नेपालमा जन्मेकाले मात्र उच्च पद पाउँने गरी संविधान संशोधन गर्नुपर्ने जनाएका छन् । अङ्गीकृत नागरिकलाई उच्च पद दिलाउने माग आफुहरुको हुँदै नभएको स्पष्ट गर्दै यादवले भने, ‘विदेशीलाई नागरिकता दिन गरीब देश नेपालले सक्दैन । अंङ्गीकृत भन्ने नै हटाइदिऊँ । वैवाहिक बंशीकृत भन्ने राखौँ, नेपालमा जन्मेकोलाई मात्र उच्च पद भन्ने व्यवस्था गरौँ । मान्छन् ठूला दल ?’ पत्रकार नारायण पौडेलसँग टेलिभिजन कार्यक्रम यक्ष प्रश्नमा कुरा गर्दै यादवले नेपालमा जन्मेका नागरिकलाई मात्र उच्च पद दिने व्यवस्था सबैभन्दा उपयुक्त हुने दावी गरे । यादवले भनेको जस्तै व्यवस्था भएको भए कृष्णप्रसाद भट्टराई, गिरिजाप्रसाद कोइराला लगायतका नेताहरु प्रधानमन्त्री बन्न पाउने थिएनन् । उनीहरुको जन्म भारतमा भएको थियो । अमेरिकामा उच्च पदमा पुग्न अमेरिकाको भुभागमा जन्मेको हुनुपर्छ । स्थानीय निकायमा गैरराजनीतिक निर्वाचन स्थानीय निकाय विकासे संरचना भएकाले राजनीतिबाट मुक्त राख्ने गरी संविधान संशोधन गर्नुपर्ने यादवको माग छ । विज्ञ वा सामाजिक अगुवा व्यक्तिगत हैसियतमा चुनाव लड्ने र स्थानीय निकायलाई राजनीतिको प्रत्यक्ष प्रभावबाट मुक्त राख्नुपर्नेमा उनको जोड छ । ‘२०४८ सालको संविधानमा काँग्रेसले यो प्रस्ताव ल्याएको थियो । एमालेले मानेन । गाऊ विकास समिति भनेपनि विकासको गतिविधि भएन । सरकारको ढुकुटी बाँडीखाने ठाऊँ बन्यो । १७ बर्षसम्म निर्वाचनपनि हुन सकेन ।’ यादवले तर्कको पुष्टि गर्ने प्रयास गरे । उनले माथिल्लो सदन राष्ट्रियसभाको गठन गर्दा स्थानीय निकायको मत गर्न नहुनेमा जोड दिए । प्रादेशिक संसद र संघीय संसदको आधारमा माथिल्लो सदनको गठन गर्नुपर्ने उनको माग छ । अभिषेक सन्की हुन्, कारवाही हुन्छ यादवले फोरम नेपालका सांसद अभिषेकप्रताप शाहलाई सन्कीको संज्ञा दिएका छन् । अलग मधेश राष्ट्रका लागि लडौँ भन्ने आह्वान गर्ने शाहलाई पार्टीले कारवाही गर्ने यादवले प्रष्ट गरेका छन् । ‘यस्ता सन्कीको के कुरा गर्ने ? अलग मधेश राष्ट्र हाम्रो माग र नीति होइन । मधेशलाई कसैले अलग गर्न सक्दैन । हामी उनीमाथि छानबिन र कारवाही गर्छौँ ।’ यादवले भने । मधेशीले भारतको दलाली कहिल्यै नगरेको यादवको दाबी छ । मधेशी, आदिवासी, जनजाति र कर्णालीका खसमाथि शासन गर्न अरुले नै भारतको दलाली गरिरहेको यादवको तर्क छ । ‘टनकपुर मधेशीले बेचेको छैन । दलाली गरेरै प्रधानमन्त्री मधेशी बनेको छैन । दक्षिणले दक्षिणको दलाली गरेको छैन, दलाली गर्नेहरुले नै राष्ट्रवादको नारा लगाइरहेका छन् ।’ यादवले एमालेलाई संकेत गर्दै कटाक्ष गरे । यादवले सरकारले ल्याएको संशोधन प्रस्ताव मूर्त नभएको जनाए । यथास्थितिमा यही प्रस्ताव मतदानमा गए आफुहरुले विपक्षमा मतदान गर्ने यादवको भनाइ छ । संशोधन प्रस्तावमाथि पूरक प्रस्ताव ल्याएर मूर्त बनाएमा आफुहरुले पक्षमा मतदान गर्ने यादवले स्पष्ट गरे । उनले तराईमा २ प्रदेश र बहुभाषिक नीतिमा जोड दिए । ‘गिरिजाप्रसाद कोइरालाले हामीलाई मधेश एक प्रदेश दिएका हुन् । सबै दलले सहमति जनाएका हुन् । थारुहरुको चाहनालाई आत्मसाथ गर्दै अर्को प्रदेश बनाउन हामी तयार भयौँ । २ प्रदेशको प्रस्ताव काँग्रेस एमालेले ल्याएका हुन् । अहिले जनता भिडाउँने खेल भइरहेको छ ।’ यादवले तर्क गरे । अब अर्को आन्दोलन फोरम नेपालका अध्यक्ष यादवले कार्यकर्ता सडकमा उत्रार्दैमा समस्याको हल नहुने बताए । बुटवलको जनसागरका बारेमा सोधिएको प्रश्नको जवाफमा उनले भने, ‘६ महिनासम्म आन्दोलन भएको नदेख्ने, पूर्वदेखि पश्चिमसम्मको मानवसाङ्लो नदेख्ने ? अहिलेको मात्र देख्ने । जनता भिडाउन खोज्नेहरुको षडयन्त्र हो यो ।’ उनले मंसिर अन्तिम साता देखि थारु, मधेशी, जनजाति र खसको सयुंक्त आन्दोलन हुने खुलाशा गरे । नयाँशक्तिसँगको एकता बारे उनले बाबुराम भट्टराईसँग पार्टी एकताका लागि प्रारम्भिक छलफलमात्र भएको जानकारी दिए । ‘छलफल ठोस रुपमा भइसकेको छैन, एकताको सम्भावना नकार्नपनि सकिदैँन ।’ यादवले भने । [embed][/embed]