काठमाडौं ४,जेठ सरकारको नेतृत्व गरिरहेको नेकपा एमालेको युवा संगठन युवा संघ नेपालले राजधानी केन्द्रित आन्दोलन थालेको मधेसी–जनजाति गठबन्धनको आन्दोलनको प्रतिकार गर्ने तयारी गरेको छ । मधेसी–जनजातिहरुको २९ दलीय गठबन्धनले जेठ १ गतेदेखि राजधानी केन्द्रित आन्दोलन थालेको छ । आइतबार र सोमवार सिंहदरबार घेराउ गरेको गठबन्धनले मंगलबार बालुवाटार घेराउ गरेको छ । संविधान पुनर्लेखनको माग गर्दै राजधानी केन्द्रित आन्दोलन थालेको गठबन्धनले माग पूरा नभएसम्म आन्दोलन जारी राख्ने भएपछि एमाले युवा संघले लखेट्ने तयारी गरेको हो । विदेशीको इशारामा आन्दोलन भइरहेको आरोप लगाएर  युवासंघले लखेटने तयारी गरीरहेकाे बताइएकाे छ। युवा संघले मंगलबार विज्ञप्ति जारी गरी मधेसी–जनजाति आन्दोलनकारीहरुलाई लखेट्ने तयारी गरेको संकेत दिएको छ । मंगलबार युवा संघ नेपालका अध्यक्ष राजीव पहारीले एक विज्ञप्ति जारी गरी विदेशीको इशारा र संलग्नतामा जनतालाई दुःख दिनेगरी आन्दोलन गरेको भन्दै संघले यस्ता गतिविधि बढ्दै गए युवा संघ चुप लागेर बस्न नसक्ने चेतावनी दिएका छन् ।