जेठ, १०, खानेपानी तथा सरसफाइ डिभिजन कार्यालय, काभ्रेपलाञ्चोकको पहलमा गाविस सामाजिक परिचालकद्वारा गरिएको पछिल्लो सर्वेक्षणले जिल्लाको १७४ स्थानमा खानेपानीको मूल सुकेपछि खानेपानीको वैकल्पिक स्रोत उपभोग भएको छ । काभ्रेपलाञ्चोक जिल्लामा भूकम्पपछि १९७ स्थानमा खानेपानीको मूल सुक्दा स्थानीयवासीले सास्ती खेपेका छन् । काभ्रेपलाञ्चोकको चण्डेनीमण्डन, तिमाल, कोसीपारिलगायतका क्षेत्रका विभिन्न गाविसमा रहेका खानेपानीको स्रोत सुकेकाले थप वैकल्पिक स्रोत खोजी गरिदिन स्थानीयवासीले अनुरोध गरेका छन् । डिभिजन कार्यालय, धुलिखेलले दिएको एक तथ्याङ्कअनुसार ४१७ खानेपानीको मूलमा पानीको स्रोत घटेको छ भने १८१ ठाउँमा पानीको वैकल्पिक स्रोतसमेत छैन । पानीको मुहान सुकेको छ तर कुन कुन ठाउँको भन्ने विषयमा विश्लेषण भएको छैन सरसफाइ डिभिजन कार्यालय, धुलिखेलका अधिकृत रामकाजी काफ्लेले भन्नुभयो । उहाँले खानेपानीको सोत सुकेको ठाउँमा के गर्ने भन्ने विषयमा ठोस प्रगति हासिल नभएको उल्लेख गर्दै जिल्लाभर नै खानेपानीको अवस्थाबारे प्राविधिकसहित सम्भाव्यता अध्ययन गरिने बताउनुभयो । काफ्लेले खानेपानीको समस्या समाधान गर्न कतिपय स्थानमा सहुलियत दर वा अनुदानमा आकासे पानीको सङ्कलन प्रविधि भित्र्याउने विषयमा समेत छलफल भएको जानकारी दिँदै कुनै पनि नीतिगत निर्णय भएको छैन भन्नुभयो । रासस