उपचारका क्रममा बेल्जियममा रहेका राष्ट्रिय फुटबल टिमका स्ट्राइकर बिमल घर्तीमगर काठमाडौं फर्किएका छन् । उनी कतार एयरबाट काठमाडौं आइपुगेका हुन् । बेल्जियम गएका बिमल बहिनी मनिषाको ज्यान गएको खबर पाएपछि फर्किएका हुन् । विमल बिहान साढे ९ बजे कतार एयरबाट काठमाडौं अन्तर्रा्ष्ट्रिय विमानस्थल आएको एन्फाका कार्यकारी अधिकृत इन्द्रमान तुलाधरले जानकारी दिनुभयो । बायाँ खुट्टाको लिगामेन्टको उपचारका लागि बिमल गएको वैशाख २९ गते बेल्जियम गएका थिए । बिहीबार नवलपरासी बर्दघाट–८ पञ्चनगरमा रहेको आफ्नै घरमा मनिषा मृत अवस्थामा भेटिएकी थिइन । बुधबार घरमा एक्लै रहेकी उनी बिहीबार बिहान मृत अवस्थामा भेटिएकी थिइन । हत्या भएको आशंकामा प्रहरीले दुई जनालाई पक्राउ गरेको छ । मनिषाको शव पोष्टमार्टमका लागि काठमाडौं ल्याइएको छ ।