ओली बोलीमै सिमित भन्दै पड्किए लोहनी, उसैगरी खनिए सरोज खनालमाथि

News

ओली बोलीमै सिमित भन्दै पड्किए लोहनी, उसैगरी खनिए सरोज खनालमाथि

शनिबार, ०४ असार २०७३ गते प्रकाशित - नेपाल आज(SS)

पूर्वअर्थमन्त्री डाक्टर प्रकाशचन्द्र लोहनीले प्रधानमन्त्री केपी शर्मा ओलीले पूराना योजनाका बारेमा हावा गफ दिइरहेको बताएका छन् । प्रधानमन्त्री ओलीले यसअघिकै बजेटमा आइसकेका योजनालाई नयां योजनाजस्तो गरी गफ दिएको तर कामका बारेमा ध्यान नदिएको लोहनीको आरोप छ । लोहनी अर्थमन्त्री हुंदा टेकुको आसपासमा ग्यास भण्डार रहेको पत्ता लागेको थियो । उनले आफ्नो कार्यकालको स्मरण गर्दै भने, ‘त्यतिबेला जापनिजले ग्यास भण्डार रहेको पत्ता लगाएका हुन् । मैले जनता र राज्यको सांझेदारीको कम्पनी खडा गरेर ग्यास उत्खनन् गर्ने प्रस्ताव पेश गरेको थिए । प्रस्तावमाथि निर्णय नहुंदै आफैं हिडिसकियो ।’ उनले डेड दशक अघि प्रस्तावित सोही काम गरेर देखाउन ओलीलाई आग्रह गरेका छन् । लोहनीका अनुसार ओलीले हुन सक्ने र गर्न नसकिने काममा ध्यान नदिएको तर सपनाका कुरा गर्ने गरेका छन् । लोहनीले काठमाडौंमा मेट्रो रेल र पूर्वपश्चिम रेलसेवा शुरु गर्नका लागि विगतकै बजेटमा पैसा छुट्टाइएको जनाउंदै पैसा फ्रिज भएको समेत प्रष्ट गरे । ‘रेल विभागसमेत गठन गरिएको थियो, पैसा छुट्टाइएको थियो तर काम भएन ।’ राप्रपाका नेता एंव पूर्वअर्थमन्त्री लोहनीले थपे, ‘पूरानै कुरालाई जोडतोडले भाषणमा व्यक्त गरेर विकास हुदैन, कामका बारेमा ओलीजीको ध्यान छ जस्तो म देख्दिन ।’ हिमालय टेलिभिजनको साप्ताहिक कार्यक्रममा कुरा गर्दै लोहनीले उपप्रधानद्वय कमल थापा र चित्रबहादुर केसीलाई पदबाट राजीनामा दिन सुझाव दिएका छन् । मन्त्रिपरिषद्मा पनि बस्ने र संविधानको विरोध गर्दै हिड्ने थापा र केसीको कदम अनैतिक भएको लोहनीको भनाइ छ ।

खनिए खनालमाथि अघिल्लो हप्ताको यक्ष प्रश्नमा अभिनेता सरोज खनालले पूर्वअर्थमन्त्री रामशरण महत र प्रकाशचन्द्र लोहनीसंग ग्रिनकार्ड अर्थात अमेरिकाको स्थायी बसोबासको प्रमाणपत्र रहेको दाबी गरेका थिए । सो दाबीलाई लोहनीले पूर्णतया झूट भनेका छन् । उनले आफूसंग नेपालको बाहेक कुनै पनि देशको कार्ड नरहेको स्पष्ट गर्दै मर्दा पनि नेपाली भएर मर्ने अठोट व्यक्त गरे । अभिनेता खनालले आफूसंग कार्ड रहेको पुष्टि गर्नुपर्ने अन्यथा सार्वजनिकरुपमा माफी माग्नुपर्ने उनको भनाइ छ । नेताहरुसंग रहेको भनिएको ग्रिनकार्ड छानबिन हुनुपर्ने उनले प्रष्ट गरे । कर्मचारीलाई निषेध गर्ने तर नेताले लिने भन्ने कुरा असुंहाउदो रहेको उनले जनाए ।

लोहनीसंगको यक्ष प्रश्न तलको लिंकमा हेर्न सक्नुहुन्छ । लोहनीले सार्वजनिकरुपमा ग्रिनकार्ड नरहेको प्रष्ट गरे पनि कांग्रेस नेता रामशरण महत, मिनेन्द्र रिजाल, एनपी साउद, नारायणसिंह खड्का र राप्रपा नेता सुनिलबहादुर थापाले केही बोलेका छैनन् । उनीहरुसंग ग्रिनकार्ड रहेको पूर्व सामान्य प्रशासनमन्त्री लालबाबु पण्डितले नेपाल आजसंगको भिडिया अन्तवार्तामा प्रष्ट गरेका थिए ।