असार - १५  । चौधरी समूहका अध्यक्ष व्यापारी विनोद चौधरीले जीवनको सारांश नै सपना देख्नु भएकाले सबै युवाले आफ्नो उज्ववल भविष्यका लागि सपना देखेर त्यसलाई पछ्याउनुपर्ने बताए ।

‘क्लक बि बिजिनेस इन्नोभेसन्स’ले आयोजना गरेको कार्यक्रममा अध्यक्ष चौधरीले सफल उद्यमी बन्न सकारात्मक सोचका साथ अघि बढ्नुपर्ने सुझाव दिँदै भने, “सफल उद्यमी बन्न व्यापार पृष्ठभूमि, साधन स्रोत र राम्रो शिक्षा चाहिन्छ भन्ने मान्यता परम्पारवादी सोच हो ।” उनले कार्यक्रममा सहभागी सयौँ युवालाई सफल उद्यमी बन्न प्रेरणा दिनुका साथै आफ्नो सफलताको अनुभवका बारेमा समेत जानकारी गराए ।

कार्यक्रममा सिएन्डइ समूहका महाप्रबन्धक ओमराज भण्डारी, ठमेल डट कमका सह संस्थापक बालकृष्ण जोशी, बाजेको सेकुवाका अध्यक्ष चेतन भण्डारी, मेघा बैंकका प्रमुख कार्यकारी अधिकृत अनिल शाह, बिबिसी नेपाली सेवाका प्रमुख रविन्द्र मिश्र, प्रिज्म एडभरटाइजिङका प्रमुख कार्यकारी अधिकृत रन्जित आचार्यले आ–आफ्ना व्यापार क्षेत्रका सफलताका कथा प्रस्तुत गर्नुका साथै सफल हुने सुत्रका बारेमा समेत सुझाव दिए। साझा मञ्च सिर्जना गरी एक व्यापारले अर्काे व्यापारलाई सञ्जालमार्फत कसरी सहयोग गर्न सक्छ भन्ने उद्देश्यका साथ आयोजना गरिएको कार्यक्रममा उद्यमी क्षेत्रका नवप्रवेशी, विभिन्न क्षेत्रका व्यापारी, विद्यार्थीलगायतका ५०० भन्दा बढी युवाको सहभागिता थियो । रासस