सिरहा २१ असार  सिरहाको दक्षिणवर्ती गाविस अर्नामा बनिनियाँका गाविस सचिव सामाजिक सुरक्षा भत्ता रकम लिएर दुई महिनादेखि फरार रहेका छन् । सामाजिक सुरक्षा भत्ता रकम लिएर सचिव फरार भएपछि भत्ता आउला र मन लागेको मिठो खाने कुरा खाउँला, एक आङ्ग नयाँ  कपाडा लाउँला भन्ने आशा गरेर बसेका वृद्ध, वृद्धा, अपाङ्ग, असाहयहरु मर्कामा परेका छन् । झापा घर भई सिरहाको अर्नामा बनिनियाँमा कार्यरत गाविस सचिव केशव घिमिरेले गाविसका ८८ एकल महिला, एकसय ९ दलित ज्येष्ठ नागरिक, ७ अपाङ्ग र ८६ अन्य ज्येष्ठ नगरिकको मंसिर, पुस, माघ र फागुनको दोस्रो किस्ताको चौमासिक समाजिक सुरक्षाको ६ लाख ३६ हजार रुपैयाँ रकम लिएर फरार रहेको सिरहाका स्थानीय विकास अधिकारी टुवराज पोख्रेलले बताए । गाविस सचिव सामाजिक सुरक्षाको भत्ता लिएर फरार भएपछि सदरमुकामस्थित जिल्ला विकास समितिमा दैनिकजसो वृद्ध वृद्धा र अपाङ्ग आउने गरेको जिविस सिरहाका लेखा अधिकृत लेखबहादुर कटुवालले बताए ।सामाजिक सुरक्षाको रकम लिएर फरार भएका सचिवको खोजीका लागि जिल्ला प्रहरी कार्यालयमा पत्राचार गरिएको जिविस सिरहाले जनाएको छ । सचिवलाई भ्रष्टचार निवारण ऐन अन्तर्गत कारवाही चलाई सेवाबाट बर्खास्त गर्नका लागि लोक सेवा आयोगलाई पत्रचार गरेको पनि स्थानिय विकास अधिकारी पोखरेलले बताए । आर्थिक वर्षको अन्तिम समय भएकाले गाविसको काम प्रभावित नहोस भनेर विकासे काम गर्न गाविसमा अर्को सचिव पठाइएको जिविस कार्याल सिरहाले जनाएको छ ।