असार - २५ । बालकृष्ण खांण कांग्रेसका प्रभावशाली युवा नेता हुन् । नेबिसंघ र तरुण दलको अध्यक्ष भइसकेका खाणको देश भर नेटर्वक छ । खाणबारे कांग्रेसमा अनेक किस्सा छन् । ह्याण्डसम बालकृष्ण खाण महिलामैत्री नेताका रुपमा पनि परिचित छन् ।

०४९ सालतिर अनेरास्ववियुले विरोधको कार्यक्रम गरिरहेको थियो । नेविसंघमाथि खनिएको थियो अनेरास्ववियु । विश्वज्योती हल अगाडी ढुंगाबाट जोखिन हम्मेहम्मे थियो । मञ्जुपनि त्यहीं लुक्दैथिइन् । खाणपनि लुक्दैथिए । लुक्ने क्रममै मञ्जु र खाणको चिनजान भयो । त्यसपछि भेट हुन थाल्यो । उनी नेता भइसकेका थिए । एक दिन खाणले मञ्जुजी राम्रो समाचार छ भन्दै मञ्जुलाई पत्रिका थमाए । गुजुल्टिएको पत्रिका खोलेर हेर्दा त्यहां त गुलाबको फूल पो रहेछ । फूलमार्फत खाणले पिरतीको बाण हानेका थिए । निशाना सही लाग्यो । प्रेम बस्यो । २०५१ साल बैशाख ११ गते त विवाह नै भयो ।

विवाहपछिपनि खाणले परिवारका लागि उतिसारो समय निकाल्न सकेका छैनन् । बुढाबुढी एक्लै घुम्न जाने, मस्ती गर्ने भन्ने त्यति छैन । कार्यकर्तासंगपनि झोक्किहाल्ने खाण श्रीमतीसंगपनि रिसाइहाल्छन् । रिसाएभने सानासाना कुरामा समेत निहुं खोज्छन् । यो जग यहां कस्ले राखेको भनेर समेत रिस फेर्ने श्रीमती मन्जुको भनाइ छ । तर, खाणको रिसमा पनि प्रेम पाउंछिन् मन्जु । गम्भीर प्रकृतिका छन् खाण । तर, कहिलेकाहीं फयाट्टै झिस्किन्छन् ।

त्योपनि सार्वजनिकस्थलमा । मञ्चमा थिए खाण । दर्शकदिर्घामा थिइन् मन्जु । ट्वाइलेट गएर फर्कदै गर्दा दुबैका आंखा जुंधे । खाणले किचिक्क एउटा आंखा चिम्लिए । वरपर महिला नै थिए । सबैले मन्जुलाई चिमोट्न थाले । मन्जुलेपनि मलाई होइन तिमीहरुलाई आंखा मारेको भनेर उम्किन खोजिन् । सबै गलल्ल हासे । हल्का पिउंछन् खाण । यूरिक एसिडका कारण सेतो रंगको मदिरा लिन्छन् । तर, प्रकाशमान सिंहको घरमा एकदिन नराम्रोसंग खाएछन् । हिड्न नसकेपछि कांग्रेसका युवा नेता सुरेन्द्र पाण्डेले बोकेरै घर पु-याएका रहेछन् ।

श्रीमान रिसाए नरिसाएको पहिल्यै थाहा पाइसक्छिन् मन्जु । सफलता पाउंदा उनी चम्किहाल्दा रहेछन् । निराश हुंदा गम्किहाल्दछन् । शेरबहादुर देउवा सभापतिमा बिजयी हुंदा खाणमा खुशीको सीमा थिएन । बुबा बित्दा समय दिन नसको पश्चतापले उनलाई लामो समय पिरोलेको थियो । (नयां पत्रिकामा मन्जुसंग बालकृष्ण खाणबारे गरिएको कुराकानीमा आधारित )

BalKrishna Khand Nepali Congress