काठमाडौं,२६ असार । सरकारले चीनलाई दुई जोडी गैडा उपहार दिने भएको छ । आज बसेको मन्त्रिपरिषदको वैठकले चिनलाई २ जोडी गैडा उपहार दिने निर्णय गरेको हो । प्रधानमन्त्री निवास बालुवाटारमा आज बसेको मन्त्रिपरिषद्को वैठकले चीनलाई २ वटा पोथी , र २ वटा भाले गैडा दिने निर्णय गरेको सरकारका प्रवक्ता एवं सुचना तथा संचारमन्त्री शेरधन राईले जानकारी दिए । उनका अनुसार अध्ययन अनुसन्धान र शिक्षा प्रबर्द्धनका लागि चीनलाई दुई जोडी गैंडा दिने निर्णय गरेको जानकारी दिए । मन्त्रिपरिषद् बैठकले पूर्वमन्त्री एवं पूर्व कानूनसचिव माधव पौडेललाई नेपाल कानून आयोगको अध्यक्षमा नियुक्त गरेको छ । वीपी कोइराला स्वास्थ्य विज्ञान प्रतिष्ठानलाई विशिष्ट सेवा सञ्चालनका लागि उपकरण खरिद् गर्न २० करोड रुपैयाँ उपलब्ध गराउने निर्णय मन्त्रिपरिषदले गरेको छ । त्यस्तै निजामती सेवामा इन्जिनियरिङ्ग सेवा तर्फबाट रामानन्दप्रसाद यादवलाई सचिवमा बढुवा गरेको छ । नेपाली सेनाका १० जना प्रमुख सेनानीलाई महासेनानीमा बढुवा गरेको छ भने १६ जना महासेनानीको सरुवाको निर्णय गरेको सरकारका प्रवक्ता संचारमन्त्री राईले जानकारी दिए ।मन्त्रिपरिषद बैठकले प्रदेशका मुख्य मन्त्री र प्रदेश प्रमुखको पारिश्रमिक तथा अन्य सुविधा सम्बन्धी विधेयक तयार पार्नका लागि सैद्धान्तिक सहमति प्रदान गरेको छ ।