स्थानीय उत्पादन नहुँदा भारतीय सीमावर्ती बजार र डडेल्धुराबाट कञ्चनपुर मण्डीमा तरकारी आयात गरेपछि मूल्य बढेको हो । वर्खामा उत्पादनमा कमी आउँनुका साथै बगरमा उत्पादन भएको तरकारी सकिँदा बाहिरबाट आयात गर्नुपरेको तरकारी व्यापारी अनिल चौधरीले बताए ।

“तरकारी आयातसँगै मूल्य दोब्बरले बढेको छ,” उनले भने– “बाहिरबाट आयात गर्दा पनि तरकारीको माग पूरा गर्न सकिएको छैन ।” दुई महिनाअघिसम्म प्रतिकिलो रु ५० मा पाइने गोलभेँडा अहिले रु १०० मा बिक्री भइरहेको छ ।

अहिले काउली, गोलभेँडा, फर्सी, लौका, मुला, करेला, भन्टालगायत तरकारीको मूल्य ४० देखि ५० प्रतिशतले बढेको छ । बजारमा प्याज प्रतिकिलो रु ४०, फर्सी रु ६०, आलु रु ४०, करेला रु ६०, भन्टा रु ६०, अदुवा रु १२०, लौका रु ६०, मुला रु ५० मा बिक्री भइरहेको छ ।

कञ्चनपुर सब्जीमण्डीका पूर्वअध्यक्ष एवम् तरकारी व्यापारी तर्कराज भट्टका अनुसार अहिले दैनिक १२ देखि १४ टन तरकारी खपत हुने गरेको छ । अहिले करेला, फर्सी, काँक्रा बाहेक अन्य तरकारी बाहिरबाट आयात हुने गरेको भट्टले बताए । “हिउँदे मौसममा कञ्चनपुर तरकारीमा आत्मनिर्भर भइसकेको छ,” उनले भने । रासस