प्रधानमन्त्री केपी शर्मा ओली सत्ता समिकरण परिवर्तन भएको विषयमा पार्टीभित्रै आलोचित भएका छन् । पार्टी सचिव योगेश भट्टराईले हिजो प्रचण्डलाई सुनको अण्डा ठान्ने र अहिले सैतान जस्तो देख्ने गरेको भन्दै भन्दै अध्यक्ष ओलीलाई व्यङ्ग गरेका छन् । दुबै अतिवादी सोच भएको भन्दै ओलीलाई बस्तुबादी विश्लेषण गर्न सुझाव दिएका छन् । उनले सार्वजनिकरुपमै पार्टी नेतृत्वलाई वस्तुवादी र माक्र्सवादी ढंगले विषयलाई बुझ्न आग्रह गरेका छन् ।

अध्यक्ष ओलीले भद्र सहमतिअनुरुप प्रचण्डलाई सरकारको नेतृत्व हस्तान्तरण गर्नुपर्ने अभिव्यक्ति दिएका बरिष्ठ नेताद्वय झलनाथ खनाल र माधबकुमार नेपाल पर्ख र हेरको स्थितिमा छन् । उनीहरुले आफु निकटका नेताहरुसँग बामपन्थी समिकरण भत्किएको तथा मधेशी, जनजाति र थारु समुदायमा पार्टीको नकारात्मक छबी बनेको भन्दै चिन्ता व्यक्त गरेका छन् ।

पार्टी उपमहासचिव घनश्याम भुसालले अध्यक्ष ओलीले पार्टीको एजेण्डामा अडान नलिंदा मुलुक सधैंका लागि अस्थिर बनेकाले प्रत्यक्ष निर्वाचित प्रधानमन्त्रीको व्यवस्थामा जोड दिएका छन् । एमालेले पहिलो र दोस्रो संविधानसभाको निर्वाचनमा प्रत्यक्ष निर्वाचित प्रधानमन्त्रीको एजेण्डा लिएको थियो । संविधानको मस्यौदामाथि जनताले सुझाव दिंदापनि देशभर सोही एजेण्डामा लहर देखिएको थियो । पार्टी अध्यक्ष ओलीले पार्टीमा छलफल नै नगरि ल्याइएको र पार्टीको हित विपरित रहेको भन्दै सो एजेण्डा छाडेका थिए ।

उपमहासचिव भुसालले नेताकार्यकर्तासँग भन्ने गरेका छन्, ‘यो त अस्थिरताको काष्टिङमात्र हो । मिश्रित निर्वाचन प्रणालीमा प्रधानमन्त्री १ बर्षपनि टिक्क सक्दैनन् । अहिले अध्यक्ष टिक्नुभएन । भोलि अर्को टिक्दैन । बुढी मरि भन्दा पनि काल पस्यो भन्ने चिन्ता लिऊं । संसदबाट निर्वाचित प्रधानमन्त्रीमा हाम्फालेर नराम्रोसँग चुक्यौं ।’

KP Oli