संसदमा माओवादी केन्द्रका अध्यक्ष प्रचण्डले प्रधानमन्त्रीलाई राजावादीसँग लगनगाँठो कसेको भनिरहंदा प्रधानमन्त्री केपी ओलीले ठूल्ठूला आँखा बनाउँदै क्वारक्वारती हेरिरहेका थिए ।

सम्भवतः पूर्वको सुपारी वा छुर्पी चपाइरहेका ओलीले टाउक्को केही हल्लाइपनि रहेका थिए । उनको अनुहारमा आवेग प्रष्ट देखिएको थियो । उता प्रतिपक्ष डेस्कमा रहेका नेपाली काँग्रेसका सांसदहरु खित्का छोडेर हासिरहेका थिए । ९ महिनासम्म ओलीको छाँयामा परेका काँग्रेसजनलाई प्रचण्डले सितलता प्रदान गरेको प्रष्टै देखिन्थ्यो । आफूले भन्न नसकेको कुरा प्रचण्डको मुखबाट सुन्दा उनीहरु दंग परेका थिए । ओलीले पानीजहाजदेखि रेलसम्मका विकासका कुरा अघि बढाएपछि उनको लोकप्रियता ह्वात्तै बढेको थियो । धेरै लामो समयसम्म सरकार चलाएपनि केही गर्न नसकेको तर ओलीले नौ महिनामै देखाइदिएको भन्दै काँग्रेसको आलोचना हुने गरेको थियो । प्रतिरक्षात्मक बनेको काँग्रेसका सांसद प्रचण्डको भाषणमा त्यतिबेला झनै मज्जाले हाँसे, जतिबेला उनले ओलीलाई विकासका सपना बाँडेको तर थाकेको भन्दै प्रहार गरे ।

 आमने-सामनेमा ओली र प्रचण्ड

ओली र प्रचण्डको राजनीतिक सम्बन्ध पछिल्लो एक बर्षमात्र मित्रवत् भएको थियो । एक बर्षयता ओलीले माओवादी अध्यक्ष प्रचण्डको सायदै आलोचना गरे । अन्यथा उनको भाषणमा प्रचण्डको उछितो कांडिएको हुन्थ्यो । पुष्पकमल दाहालमात्र भन्ने ओलीले प्रचण्ड भन्न थालेका थिए । उनी कांग्रेसप्रति खनिन थालेका थिए । अविश्वासको प्रस्ताव दर्ता गराएपछि पनि ओलीले प्रचण्डलाई नामै किटेर केही भनेका थिएनन् । शुक्रबार प्रचण्डले संसदमा ओलीलाई सामुन्नेमा राखेर ओलीको धज्जी उडाएपछि राजनीतिक वक्तव्यवाजीमा परिवर्तन आउने देखिएको छ ।

प्रचण्डले पहिले फायर खोलेर ओलीलाई कमव्याकका लागि आमन्त्रण गरेका छन् । यसअघि प्रचण्डलाई ओलीले बिरालोको संज्ञा दिइसकेका थिए । काठमाडौंमा बाट उछिट्टिएको बिरालो रोप्पा पुगेर खाँमो चिथोर्छ भन्नै प्रचण्डलाई उनले केही गर्न नसक्ने व्यक्तिको रुपमा अर्थाएका थिए । तीन दलको बैठकपछि रोल्पा पुगेका प्रचण्डले निहुँ खोज्दै गए फेरि पनि रोल्पाले देखाइदिने अभव्यिक्ति दिएका थिए ।

ओलीले माओवादीलाई 'गुरिल्ला' भन्थे । शान्ति प्रक्रियामा आइसकेपछि पनि ओलीले गुरिल्लाहरुले राजनीति सिक्दै गरेको भनेर टिप्पणी गर्थे । एक बर्ष यता ओलीले माओवादीप्रतिको अभिव्यक्तिमा व्यापक फेरबदल गरेका थिए । शुक्रबार प्रचण्डले उनीमाथि धावा बोलेपछि उनकाे अभिव्यक्तिमा परिवर्तन आउने देखिएको छ । प्रचण्ड प्रधानमन्त्री हुँदा र ओली प्रमुख प्रतिपक्ष दलको नेता हुँदाको परिश्थितिमा ओलीको आक्रमकता कस्तो होला ? धेरैले अनुमान गर्न थालेका छन् । कसैले प्रधानमन्त्री दिन्छु भनेकै भरमा दाम्लो चुंडाएर हिडेको भनि प्रचण्डलाई सांकेतिकरुपमा उनले प्रहार गरिसकेका छन् । ओलीले उनकै शब्दमा 'गुरिल्ला' माओवादीप्रति कसरी जवाफ फर्काउछन् भन्ने चासो सामाजिक संजालमा व्यक्त हुन थालेको छ ।

KP Sharma Oli Prachanda puspa kamal dahal