साउन - १० । मोरङको पहाडी गाविस रमितेखोला स्थित ध्वाँसे भिरमा गए राति पिक अप भ्यान दुर्घटना हुँदा २ जना किशोरको मृत्यु भएको छ भने ८ जना गम्भीर घाइते भएका छन् । मोरङकै टाँडीमा भएको स्थानीयस्तरको फुटबल प्रतियोगीतामा विजयी भई घर फर्किने क्रममा राती ८ बजेतिर भ्यान दुर्घटना हुँदा रमितेखोला गाविस –७ का १८ वर्षीय सिद्धि राई र इलाम साक्फारा गाविस –१ का १५ वर्षीय सन्दीप राईको मृत्यु भएको छ । सिद्धि राईको घटनास्थलमै र सन्दीप राईको उपचारको लागि विराटनगर ल्याउँदै गर्दा बाटोमै मृत्यु भएको मोरङ प्रहरीले जनाएको छ । मोरङकै टाँडीबाट रमितेबजारतर्फ जाँदै गरेको को १ ज १७५५ नंम्बरको पिकअप भ्यान रमितेखोला गाविस– २ स्थित भिरबाट ध्वासे खोलामा खसेर दुर्घटना भएको हो । दुर्घटनामा रमितेखोला गाविस –२ का २५ वर्षीय नन्दकुमार राई, २६ वर्षीय पदम राई, २८ वर्षीय उमेश गुरुङ, १८ वर्षीय दिलीप राई, १३ वर्षीय सविन राई, रमितेखोला गाविस –७ का तजिन राई, १७ वर्षीय सविन राई र रमितेखोला गाविस –९ का २४ वर्षीय अर्जुन राई गम्भीर घाइते भएका छन् । घाइते सबैको न्युरो अस्पताल विराटनगरमा उपचार भइरहेको छ । दुर्घटनामा परेको पिकअप भ्यानका चालक फरार रहेकाले खोजी भइरहेको प्रहरीले जनाएको छ ।

Accident Accident of nepal