साउन २७ । इपीएस परीक्षार्थीले परीक्षा दिएकै दिन आफूले प्राप्त गरेको नम्बर हेर्न पाउने भएका छन् । परीक्षा दिएकै दिन कति नम्बर आयो, कुन प्रश्नको उत्तर बिग्रियो अनि कुन चाहिँ मिल्यो भन्ने जानकारी परीक्षा दिने बित्तिकै दिइने तयारी गरिएको हो । काम गर्न दक्षिण कोरिया जान चाहनेले सन् २०१९ देखि अनिवार्य रुपमा कम्प्युटरमै परीक्षा दिनुपर्ने व्यवस्था गरिएको छ । यो व्यवस्थासँगै परीक्षा लिने बित्तिकै प्राप्तांक पनि देखाउने प्रणाली विकास गर्न लागिएको हो ।

हाल परीक्षा दिएपछि नतिजा थाहा पाउन लामो समय कुर्नुपर्ने बाध्यता छ । कागजी प्रणालीमा परीक्षा लिइने भएकाले परीक्षा गर्न लामो समय लागेको हो । कम्प्युटर प्रणलीबाट परीक्षा लिएपछि उत्तर मिले–नमिलेको सिस्टमले परीक्षण गर्ने व्यवस्था हुनेछ । सोही आधारमा कुन प्रश्नको उत्तर मिल्यो वा मिलेन अनि कति अंक प्राप्त भयो भन्ने जानकारी परीक्षार्थीलाई देखाउन लागिएको हो । कोरिया जाने परीक्षार्थी अब कम्प्युटरमा पनि साक्षर हुनैपर्ने भएका छन् । ग्रामीण क्षेत्रका युवाले पनि कोरिया जानका लागि कम्प्युटरका आधारभूत ज्ञान हासिल गर्नुपर्नेछ । कम्यूटरमा बसेर परीक्षा दिन नसक्नेहरु त्यहाँ जानबाट वञ्चित हुनेछन् । अन्नपूर्ण पोष्ट