साउन - २८। महानगरीय प्रहरी परिसर भक्तपुरका प्रमुख प्रहरी उपरीक्षक किरण बज्राचार्यले वैदेशिक रोजगारीका नाममा धेरै नेपाली चेली बेचिएको बताए ।
उनले विदेशमा गएर पैसा कमाउने लोभमा गाउँका मात्र नभई सहरीया महिलासमेत दलालको लहलहैमा फसेको उल्लेख गरे ।
भक्तपुर जिल्ला विकास समितिअन्तर्गतको महिला समन्वय समितिले प्रदान गरेको सम्मान ग्रहण गर्दै प्रहरी उपरीक्षक बज्राचार्यले मानव तस्करीको जालो ग्रामीण भेगमा मात्र नभई सहरी क्षेत्रमा समेत व्याप्त रहेको स्पष्ट पारे । उनले उच्च शिक्षा हासिल गरेका र आर्थिक हैसियत राम्रै भएका समेत अमेरिका युरोप जाने प्रलोभनमा मानव तस्करीको जालोमा पर्ने गरेको चर्चा गरे ।
प्रहरी उपरीक्षक बज्राचार्यलाई गत ३० जुनमा अमेरिकी विदेश मन्त्रालयले नेपालमा ‘मानव बेचबिखनविरुद्ध सक्रिय काम गरेको’ भन्दै ‘२०१६ हिरो एक्टिङ टु एन्ड मोर्डन स्लेभरी’ पुरस्कारले सम्मान गरेको थियो । उनले केन्द्रीय अनुसन्धान ब्युरो (सिआइबी) को ‘तीन नम्बर पिल्लर’ मा छँदा महिला बेचबिखनविरुद्ध अनुसन्धान गर्दै ‘डान्सर’ का रूपमा अफ्रिकी मुलकमा हुने महिला तस्करी र ‘म्यारिज ब्युरो’ का नाममा हुने महिला तस्करीको पर्दाफास गरेका थिए।
Kiran Bajracharya
