साउन - ३० । बैतडीको तल्लादेही गाविस– ८ मा रहेको डाँडाखाली बस्तीलाई सानुपर्ने भएको छ ।  प्रहरीले तयार पारेको स्थलगत प्रतिवेदनमा बस्ती जोखिममा रहेको र त्यसलाई सार्नुको विकल्प नरहेको जनाइएको छ ।

तल्लादेहीको डाँडाखालीमा जमिन भासिएर ५२ परिवार बसोवास गर्ने उक्त वस्ती पूरै जोखिममा परेपछि प्रहरी निरीक्षक हरिओम खड्काको नेतृत्वको टोली तल्लादेही पुगेको थियो ।

शुक्रबार राति गएको पहिराले चार घरपरिवारको उठिबास भएको र सो क्षेत्रको जमिन पूरै भासिनुका साथै डेढ फिट तल सरेकाले बस्ती नै सानुपर्ने सुझावसहितको प्रतिवेदन पेस गरेको निमित्त प्रमुख जिल्ला अधिकारी दीपककुमार आचार्यले जानकारी दिए । 

प्रमुख जिल्ला अधिकारी अहिले जिल्ला बाहिर रहेकाले फर्कने बित्तिकै जिल्ला दैवीप्रकोप उद्धार समितिको बैठक राखी निर्णय लिइने आचार्यले बताएका छन् । उनका अनुसार प्राविधिक प्रतिवेदन भने आउन बाँकी छ । रासस