भदाै - ५ । बेनी नगरपालिका– १ रत्नेचौरमा प्रहरी चौकी उद्घाटन गरिएको छ ।

बागलुङबाट म्याग्दी आउने प्रवेशद्वारका रुपमा रहेको रत्नेचौर क्षेत्रको शान्ति सुरक्षार्थ सो चौकीको आज अञ्चल प्रहरी कार्यालयका प्रमुख प्रहरी वरिष्ठ उपरीक्षक छविलाल जोशी बञ्जाडेले उद्घाटन गरेका छन् ।

सो अवसरमा बञ्जाडेले प्रहरीले नागरिकको आवश्यकतानुसार आफ्नो जिम्मेवारीलाई बहन गर्ने र चौकीको आवश्यकतानुसार स्तर वृद्धि हुने जानकारी दिए ।

प्रजिअ केशवराज आचार्यले स्थानीयवासीको माग र सुरक्षा संवेदनशीलताका आधारमा चौकी स्थापना गरिएको र गुणस्तरीय शान्ति सुरक्षा प्रदान गर्न प्रविधिमैत्री सुरक्षा योजना बनाइरहेको बताएका हुन् ।

हाल उक्त चौकीमा पाँच प्रहरी छन् । चौकी राख्नका लागि भौतिक पूर्वाधारको अभाव भएपछि स्थानीय ‘चेतनशील आमा’ समूहले निर्माण गरी उपलब्ध गराएको दुईतले भवनमा रहेर तत्कालका लागि शान्ति सुरक्षाको सेवा प्रवाह गर्न सुरु गरिएको प्रहरी नायब उपरीक्षक विश्वराज खड्काले बताए ।