भदौ - १२ । नारायणगढ–मुग्लिन सडकखण्डमा सवारी दुर्घटना बढ्दै गएपछि चेकजाँचमा कडाइ थालिएको छ भने संवेदनशील क्षेत्रमा ट्राफिक चिह्न र सुरक्षाबार राखिने भएको छ । शुक्रबार बिहान बस र शनिबार बिहान ट्रक त्रिशूली नदीमा खसेपछि सुरक्षा निकाय र सडक डिभिजनको समन्वयमा सो सडक क्षेत्रमा आइतबारबाट ट्राफिक चिह्न र सुरक्षाबार निर्माण गर्ने कार्य थालिने भएको हो । चितवनको मौवाखोलादेखि आँपटारीसम्मको सडक क्षेत्रमा यो कार्य गरिने छ । सो सडकखण्डको मध्ये क्षेत्र प्रहरी प्रमुख प्रहरी नायब महानिरीक्षक पशुपति उपाध्यायसहितको टोलीले शनिबार निरीक्षण गरी तत्काल काममा सहयोग पुर्याउन मातहतका प्रहरीलाई निर्देशन दिएका हुन् । जिल्ला प्रहरी कार्यालय चितवनका प्रमुख प्रहरी उपरीक्षक वसन्तबहादुर कुँवरका अनुसार सो सडकको संवेदनशील क्षेत्रहरूमा सवारी साधन ठोक्किँदासमेत तल नखस्ने गरी प्यारामिटर र ग्याभिन बार लगाइने भएको छ । सडकको अवस्थाका बारेमा चालकलाई जानकारी होस् भन्नका लागि अधिकतम ठाउँमा ट्राफिक सङ्केत चिह्न राखिने कुँवरले बताए । मुग्लिनबाट मौवाखोलासम्म भने डिभिजन सडक कार्यालय भरतपुरले यो काम गर्ने छ । शुक्रबार बस दुर्घटना भएको स्थान अत्यन्त संवेदनशील भएकाले उक्त स्थानमा अाइतबार साँझसम्म ग्याभिन निर्माण सम्पन्न गर्न निर्देशन दिइएको कुँवरले बताए । सो स्थानबाट बस त्रिशूलीमा खस्दा २२ जनाको मृत्यु भएको थियो भने १६ जना घाइते छन् । मुग्लिनबाट मौवाखोलासम्म भने डिभिजन सडक कार्यालय भरतपुरले यो काम गर्ने छ । शुक्रबार बस दुर्घटना भएको स्थान अत्यन्त संवेदनशील भएकाले उक्त स्थानमा आजै साँझसम्म ग्याभिन निर्माण सम्पन्न गर्न निर्देशन दिइएको कुँवरले बताए । अर्कोतर्फ प्रहरीले सवारी साधनमाथिको चेकजाँचलाई समेत कडाइ गरेको छ । जिल्ला ट्राफिक प्रहरी कार्यालय चितवनका प्रमुख प्रहरी निरीक्षक राजन भेटवालका अनुसार, नारायणगढ–मुग्लिन सडकखण्ड हुँदै जाने सवारी साधनलाई जुगेडीमा चेकजाँच थालिएको छ । काठमाडौँबाट पोखरातर्फ जाने आउने सवारी साधनलाई मुग्लिन, पूर्वबाट आउने सवारी साधनलाई भण्डारा र पूर्व जाने सवारी साधनलाई गोन्द्राङमा कडाइका साथ चेकजाँच थालिएको भेटवालले बताए । चितवन हुँदै दैनिक छदेखि सात हजार सवारी साधन ओहोरदोहोर गर्ने ट्राफिक प्रहरीको तथ्याङ्क छ ।

saftey bar traffice chenna trishuli