भदाै - १६ । युवक कवि मोतीराम भट्टको एक सय ५१ औं जन्मजयन्तीका अवसरमा ३० स्रष्टाले गजल वाचन गरेका छन् ।

नेपाल प्रज्ञा–प्रतिष्ठानद्वारा बिहिबार आयोजित ‘समकालीन नेपाली गजलका प्रवृतिहरु’ विषयको गोष्ठी तथा गजल वाचन कार्यक्रममा विजय सुब्बा, धीरेन्द्र प्रेमर्षि, बलराम तिमल्सिना, गोपाल अश्क, देवी नेपाल, करुण थापा, तपेन्द्र घोरासैनी, शीतल कादम्बिनी, भावना पाठक आदिले गजल वाचन गर्नुभयो । अधिकांशले माया–प्रेम, मिलन–बिछोड, अमर प्रेमका गाथासम्बन्धी विषयमा गजल वाचन गरे भने कतिपयले राष्ट्रियता, भौगोलिक एकता, प्राकृतिक सौन्दर्य, युवा र बेरोजगार, जीवन सङ्घर्ष, द्वन्द्व र शान्ति तथा सामाजिक र राजनीतिक विषय समेटेका थिए । कार्यक्रममा प्रज्ञा–प्रतिष्ठानका उपकुलपति डा विष्णुविभू घिमिरे, मातृ भाषा विभाग प्रमुख श्रवण मुकारुङ लगायतले युवक कवि भट्टले आदिकवि भानुभक्त आचार्यको प्रतिभालाई जनतासम्म ल्याएर नेपाली भाषाको श्रीवृद्धिमा टेवा पुर्‍याएको बताए ।

त्यस्तै समसामयिक नेपाली गजल (विसं २०४६ यताका गजल)बारे कार्यपत्र प्रस्तुत गर्दै नेत्र एटमले शृङ्गारिकभन्दा व्यङ्ग्यात्मक गजल शक्तिशाली भएको आफूले पाएको बताए कार्यपत्रमाथि टिप्पणी गर्दै वरिष्ठ गीतकार डा कृष्णहरि बरालले समसामयिक भनेर ४६ सालपछिका भनिए पनि कार्यपत्रमा २०६० पछिका गजल मात्र समेटिएको बताएका छन् । कार्यक्रममा वरिष्ठ सङ्गीतकार दीपक जङ्गम र ‘आगमन’ गजलसङ्ग्रहका रचनाकार वासुदेव पाण्डेय ‘प्रभाकर’लाई ‘मोतीराम सेतुराम गजल पुरस्कार –२०७३’द्वारा सम्मान गरिएको थियो । उनिहरुलाई जनही रु पाँच हजार प्रदान गरियो । सो पुरस्कारको स्थापना डा माधवप्रसाद बरालले गरेका हुन्।

gal bachan moti ram bhatta