भदाै - १९ । सिरहा विद्युत प्राधिकरण कार्यालयले समयमा विद्युत महसुल नबुझाउने ४१ सेवाग्रहीका तार छुटाउन थालेको छ । कार्यालयले भदौ ६ गतेदेखि १६ गतेसम्ममा ४१ जना ग्राहकको विद्युतीय तार छुटाइएको जनाएको छ । विद्युतकाे बाँकी रकम समयमा नबुझाउने र पटकपटक विद्युत महसुल बुझाउन आग्रह गर्दासमेत बेवास्ता गर्ने ग्राहकका तार छुटाउन थालेको कार्यालय प्रमुख जितेन्द्र यादवले जानकारी दिएका छन् । उनका अनुसार तार छुटाइएको ४१ ग्राहकबाट करिब रु ३६ लाख पाँच हजार भन्दा बढी बक्यौता उठाउन बाँकी छ । यसैबीच सो कार्यालयले तीन दिनको अवधिमा विद्युत चोरी गर्ने १६ जनालाई पक्राउ गरी तिनबाट रु ८० हजार जरिवाना असुली गरेको छ । जिल्लाको विभिन्न गाविसबाट विद्युत चोरी गर्ने व्यक्तिसँगै ३७ थान पानी तन्ने मोटर, १० थान टिभी र २१ थान पङ्खा बरामद गरेको प्रमुख यादवले जानकारी दिए । गतआवमा पनि विद्युत चोरी गर्ने १४४ जनालाई पक्राउ गरी तिनबाट रु सात लाख २० हजार जरिवाना असुलेको थियो । कञ्चनपुर– नेपाल विद्युत् प्राधिकरण महेन्द्रनगर वितरण शाखाले लामो समयदेखि विद्युत् महसुल नतिर्ने कृष्णपुर, झलारी, महेन्द्रनगर, खैरभट्टी, निम्बुखेडा क्षेत्रका १६५ ग्राहकको विद्युतीय तार छुटाएको छ । तार छुटाइएका ग्राहकबाट रु २० लाख ९० हजार बक्यौता असुल भएको प्राधिकरणको शाखाका प्रमुख भोजराज जोशीले बताए । पहिलो चरणमा रु दश हजारभन्दा बढी महसुल तिर्न बाँकी रहेका ग्राहकको तार छुटाएको हो । महशुल नबुझाउने ४४ हजार ९१३ ग्राहकबाट प्राधिकरणले रु दश करोड ८८ लाख ७१ हजार ६५ बक्यौता असुल गर्न बाँकी रहेको छ ।

bidhut katna thalyo nepal bidhut pradhikaran Siraha