असोज १२ ।कोपा अमेरिकामा आफ्नो टिम अर्जेन्टिनालाई फाइनलमा जिताउन असफल भएपछि फुटबल स्टार लियोनल मेसीले तत्कालै सन्यासको घोषणा गरे । तर, उनको यो घोषणा लामो समयसम्म टिकेन । अर्जे्न्टिनाका राष्ट्रपतिदेखि प्रशंसकको आवाज सुन्दै उनले अहिले सन्यासको घोषणा फिर्ता लिइसकेका छन् । यसलाई मेसीको अस्थिरता पनि भन्ने गरिएको छ ।

तर, मेसी खानपिनको च्वाइसमा भने बाल्यकालदेखि नै स्थिर छन् । उनी सानैदेखि गुलियो भनेपछि हुरुक्क हुन्थे । गुलियोप्रतिको उनको मोहलाई कोचले उपयोग गर्ने गर्थे । मेसीले हरेक गोलबापत कोचले उनलाई प्रोत्साहनस्वरूप चिनी प्रशस्त मिसाइएको बिस्कुट दिने गर्थे । राम्रो खेल्ने लालसामा गुलियो बिस्कुटको आकर्षण थपिएपछि मेसी पनि गोल गर्न मरिमेटेर लागिपर्ने गर्थे ।

उनी खानाका पारखी पनि हुन् । उनको सबैभन्दा मन पर्ने परिकार बोनलेस मिटबाट बन्ने इस्केलोप मिलानिज नाम गरेको अर्जे्न्टिनामा प्रचलित परिकार हो । मेसी सानो छँदा उनकी आमाले हप्तामा दुई अथवा तीनपटक सो परिकार बनाउनै पथ्र्यो । मेसी ठूलो भएपछि पनि मन परेको खाना खान मरिमेट्थे । खानपानमा परहेज नअपनाउने उनको स्वभावमा अंकुश लगाउन कोचलाई हम्मेहम्मे पर्ने गथ्र्यो । सागपात र सलाद भने मेसीको रोजाइमा हत्तपत्त पर्दैन थियो ।

तर, खानाका पारखी मेसी किताब पढ्न र फिल्म हेर्न त्यति रुचाउँदैनन् । उनले अत्यन्तै कम किताब पढेका छन् । उनको सबैभन्दा मनपर्ने किताब ‘एल मार्टिन फिरो’ नामक कवितासंग्रह हो, जसलाई अर्जे्न्टिनाको ‘मुनामदन’ भन्दा हुन्छ । यो किताब विद्यालयस्तरको पाठ्यक्रममा समेत समावेश छ ।

अर्जे्न्टिनामा फुटबलर म्याराडोनाको आत्मवृत्तान्त पनि बढी बिक्री हुने किताबमा पर्छ । अझ अर्जे्न्टिनी फुटबलरले त म्याराडोनाको आत्मवृत्तान्तलाई ठूलो श्रद्धा र उत्साहका साथ पढ्ने गर्छन् । तर, मेसीले जति गर्दा पनि म्याराडोनाको किताब पढ्न सकेनन् ।

फिल्म हेर्न बस्दा कथा थोरै घुमाउरो हुनासाथ टिभी बन्द गरिहाल्छन्, मेसी । ‘लस्ट’ र ‘प्रिजन ब्रेक’ फिल्म उनले कहिल्यै पूरै हेर्न सकेनन् । यद्यपि, उनले ‘एल हिजो डी ला नोभिया’ फिल्म निक्कै ध्यान दिएर हेरे । ‘त्यो फिल्मले मलाई मोहित बनायो, किनकि त्यसकी नारी पात्रले मलाई मेरी हजुरआमाको स्मरण दिलाएकी थिइन्,’ एक अवसरमा उनले भनेका थिए ।

फुर्सदमा फुटबल हेरेर उनले समय काट्ने गरेका छन् । केही काम नभएको वेला टिभी हेर्नु, पढ्नु अथवा गीत सुन्नुको सट्टा उनी सुत्न रुचाउँछन् । नयाँ पत्रिका

Messi