पूर्वमन्त्री घिमिरेको जिप खोज्दा पहिले नै हराएको ट्रक भेटिएको अनुमान, बढी वजनको वस्तु तान्ने मेसिन प्रयोग गर्ने तयारीमा सेना (भिडियोसहित)
असोज १३ । गत आइतबार पृथ्वीराजमार्ग अन्तर्गत चितवनको घोप्टेभिरबाट त्रिशुली नदीमा खसेको पूर्वमन्त्री माधवप्रसाद घिमिरेको जिप फेला परेको खबर हल्ला मात्रै भएको नेपाली सेनाले जनाएको छ ।
सो हल्लाबारे स्पष्ट पार्दै नेपाली सेना देवीदत्त गणका क्याप्टेन भरतबहादुर बुढाथोकीले भने, ‘हामीले प्रयास गरिरहेका छौं । अहिले फेला अड्किएको हुक भने भदौ २४ मा हराएको ट्रकको हो भन्ने लागेको छ ।’
सेनाले फालेको मध्ये दुईवटा हुक पानीमुनी अड्किएको थियो । त्यो मध्ये एउटाको लठ्ठा नै चूँडिएको छ । अर्को हुकले वजन धान्न नसकेर नै बांगिएर आएको छ । क्याप्टेन बुढाथोकीले भने, ‘बांगिएर आएको हुकमा पाइपको डाम बसेको छ । निलो रङ हुकमा लागेको छ । यसकारण त्यो ट्रक हो कि भन्ने हाम्रो अनुमान हो । ’
हुक अड्किएर तान्दा लठ्ठा चूँडिएपछि वेल्डिङ गर्न पठाइएको छ । बढी वजनको बस्तु तान्ने थप क्षमताको यन्त्र ‘रिकभरी’ नेपाली सेनाले प्रयोग गर्ने तयारी गरेको छ ।
गत आइतबार पूर्वमन्त्री माधवप्रसाद घिमिरेको जिप त्रिशुलीमा खसेको थियो । जिपमा पूर्वमन्त्री घिमिरे उनका भाई प्रकाश र मोहन पनि अझै बेपत्ता भइरहेका छन् । घटनामा घिमिरेकी आमा, अंगरक्षक, एक आफन्तको निधन भइसकेको छ ।
भिडियो सौजन्य : नेपाली सेना ।
Bharat Bhadur Budhathoki Car Accident Harayo Madhav Prasad Ghimire Nepali army Trisuli River
