असोज - १४ । सूचना तथा सञ्चार मन्त्रालयले मातहतका निकाय र विभागसँग कार्यको परिणाममुखी नतिजाका लागि कार्यसम्पादन सम्झौता गरेको छ । मन्त्रालयमा आज आयोजित कार्यक्रममा राष्ट्रिय समाचार समिति (रासस), गोरखापत्र संस्थान, सूचना विभाग, नेपाल दूरसञ्चार प्राधिकरण, रेडियो प्रसार सेवा विकास समिति रेडियो नेपाल, न्यूनतम पारिश्रमिक निर्धारण समिति, मुद्रण विभाग, राष्ट्रिय चलचित्र विकास बोर्डसँग सो सम्झौता गरिएको हो । यसपछि नेपाल टेलिभिजन, नेपाल टेलिकम र हुलाक विभागसँग पनि छिट्टै कार्यसम्पादन सम्झौता गरिने मन्त्रालयले जनाएको छ । मन्त्रालय मातहतका निकाय राष्ट्रिय सूचना आयोग र प्रेस काउन्सिल नेपाल भने कानुनद्वारा स्वायत्त भएकाले सो सम्झौता नगरिने भएको छ । सो अबसरमा सूचना तथा सञ्चारमन्त्री सुरेन्द्रकुमार कार्कीले सरकार कति दिनसम्म रहन्छ भन्ने भन्दा पनि आफ्नो प्रतिबद्धतामा इमान्दार भएर काम गर्न कर्मचारीलाई निर्देशन दिए । आफूुले मातहतका निकायमा अपेक्षाकृत प्रगति नदेखेको गुनासो गर्दै उनले भने – “कर्मचारीतन्त्र आफँैले बनाएको कानुनी प्रणालीमा अल्झेको छ ।” कर्मचारीतन्त्रमा स्वार्थ पूरा हुने काम चाँडै गर्ने र अन्य काममा ढिलासुस्ती गर्ने प्रवृत्ति रहेको मन्त्री कार्कीले भने । राष्ट्रिय योजना आयोगका सूचना तथा सञ्चार विषय हेर्ने सदस्य प्राध्यापक इन्जिनियर भूपेन्द्रमान प्रधानले मन्त्रालय र मातहतका निकायबीच हुने कार्यसम्पादन सम्झौताले परिणाममुखी नतिजा ल्याउने बताए । मुख्य सचिव डा सोमलाल सुवेदीले नेपालमा स्थानीय विकास मन्त्रालयबाट सुरु गरिएको कार्यसम्पादन सम्झौता सकारात्मक भएको बताउँदै यसलाई क्रमशः सबै मन्त्रालयमा लागू गर्दै जाने जानकारी दिए । सरकारका काम कारबाहीलाई प्रभावकारी र परिणाममुखी बनाउन कार्यसम्पादन सम्झौता आवश्यक रहेकोमा जोड दिँदै उहाँले भन्नुभयो – संविधान कार्यान्वयनमा समेत यसले उल्लेख्य योगदान दिने छ । सञ्चार सचिव दिनेश थपलियाले संस्थाको समग्र प्रगतिको सूचकका रुपमा कार्यसम्पादन सम्झौता ल्याएको बताउँदै यसको प्रभावकारी कार्यान्वयनका लागि मन्त्रालयले मातहतका निकायसँग र निकायले आफ्ना विभाग तथा महाशाखासँग समन्वय गर्नुपर्ने निर्देशन दिए । कार्यक्रममा मन्त्रालय मातहतका निकायका प्रमुखले सम्झौतामा हस्ताक्षर गर्दै निर्धारित समयमा तोकिएका कार्य गर्ने प्रतिबद्धता व्यक्त गर्नुभएको थियो । रासस

sanchar matralaya