काठमाडौं । प्रधानमन्त्री शेरबहादुर देउवाले राष्ट्रिय समाचार समितिको नयाँ कार्यालय भवनको शिलान्यास गरेका छन् ।

विसं २०७२ वैशाख १२ गते गएको विनाशकारी भूकम्पले भद्रकाली प्लाजास्थित राससको केन्द्रीय कार्यालय भवनमा क्षति पु¥याएको थियो । ४५ वर्षभन्दा पुरानो भवनको सोही स्थानमा नयाँ भवन निर्माण गर्न लागिएको हो ।

सहरी विकास मन्त्रालयअन्तर्गतको केन्द्रीय आयोजना एकाइले भवन निर्माणको जिम्मा लिई निजी निर्माण कम्पनी सिद्धबाबा कन्स्ट्रक्सन प्रालिमार्फत काम अघि बढाएको छ । उसले आगामी २०७६ साउन ६ गतेभित्र निर्माण सम्पन्न गर्नेछ ।

नवनिर्माणका लागि आवश्यक आर्थिक सहयोग राष्ट्रिय पुनःनिर्माण प्राधिकरणमार्फत उपलब्ध भई अत्याधुनिक चारतले भवन निर्माण हुनेछ । भवनमा सामाचार, अडियो, भिडियो र फोटो सेवालाई समयसापेक्षरुपमा सप्रेषण गर्न आवश्यक सम्पूर्ण सुविधा उपलब्ध हुनेछ ।

निजी क्षेत्रबाट विसं २०१६ पुस १ गते स्थापना भएको नेपाल संवाद समिति र विसं २०१७ वैशाख ३० गते स्थापना भएको सगरमाथा संवाद समिति गाभिएर राष्ट्रिय संवाद समितिको गठन भएको थियो । स्थापनाको १० वर्षपछि संवाद समितिलाई राष्ट्रिय समाचार समितिमा रुपान्तरण गरिएको थियो ।

राससले नेपाली र अङ्ग्रेजी भाषामा देशभरबाट प्राप्त महत्वपूर्ण समाचार हरेक दिन विहान ६ः०० बजेदेखि राति ११ः०० बजेसम्म आफ्ना सेवाग्राही आमसञ्चारका माध्यमलाई विद्युतीय अनलाइन सेवामार्फत सप्रेषण गर्दै आइरहेको छ ।

त्यसैगरी गरी अन्तर्राष्ट्रिय समाचार संस्थाहरु एपी, एएफपी, सिन्ह्व, क्योदा, पिटीआइलगातका विश्वका प्रतिष्ठित समाचार संस्थाका समाचार नेपाली भाषामा अनुवाद गरी हरेक दिन बिहान ११ः०० बजेदेखि राति १०ः०० बजेसम्म सेवाग्राहीलाई उपलब्ध गराउँदै आएको छ ।

आर्थिक, सामाजिक, राजनीतिकजस्ता विविध क्षेत्रमा अनुसन्धानमूलक गहन आलेख र आर्थिक समाचार, महत्वपूर्ण समाचारका अडियो क्लिप, स्वदेश तथा विदेशका फोटो सेवा राससले नियमितरुपमा उपलब्ध गराएको छ ।

मुलुकभरका गाउँपालिका, जिल्ला, प्रदेशमा स्थानीय समाचारदाता रहेका छन् भने नेपाली समुदायको उल्लेख्य उपस्थिति रहेका मुलुकमा स्थानीय समाचारदाता रहेका छन् ।

निष्पक्ष, आधिकारिक, विश्वसनीय समाचार सम्प्रेषण गर्ने समाचार बैंकका रुपमा स्थापित राससले हाल देशभरका छापा, प्रशारण तथा अनलाइन गरी २४० भन्दा बढी आमसञ्चारका माध्यमलाई आफ्नो सेवा उपलब्ध गराउँदै आएको छ ।

यसले आफ्नो स्थापनाको रजत जयन्ती २०४३ र स्वर्ण महोत्सव २०६८ सालमा मनाइसकेको छ ।