अमेरिकी राष्ट्रपति डोनाल्ड ट्रम्प अाफ्नै विषयमा चर्चामा अाइरहन्छन् । तर शनिबार भर्जिनियामा एक महिलाले साइकलबाट ट्रम्पलाई माझी औँला देखाएको फोटो चर्चाको विषय बनेको छ ।

शनिबार पोटोमाक नदी किनमारमा रहेको ट्रम्प नेसनल गल्फ क्लब पुगेका थिए राष्ट्रपति ट्रम्प । गल्फ क्बलबाट ठीक ३ः१२ बजे ट्रम्पको गाडि बाहिरिएको थियो । लगत्तै गाडिले दुई जना व्यक्तिलाई पार गरेको ह्वाइट हाउस प्रेस पुलको रिपोर्टहरुमा जनाइएको छ ।

ट्रम्पको गाडिले आफूलाई उछिनेको ती महिलाले देखिन् । यो मौकालाई खेर जान नदिइ उनले आफ्नो माझी औँलो ट्रम्पको गाडिलाई देखाइन् ।

केहीबेरपछि ट्राफिक बत्तीका कारण ट्रम्पको गाडि धिमा भएको बेला सााइकलमा आइरहेकी ती महिलाले उनीहरुलाई फेरि भेटिन् । त्यसबेला पनि उनले फेरि उही व्यवहार दोहार्‍याइन् ।

उनको सो फोटो लगत्तै चर्चाको विषय बन्यो । ती महिला को हुन् र उनको व्यवहारलाई राष्ट्रपति ट्रम्पले देखे कि देखेनन् भन्ने स्पष्ट नभइसकेको जनाइएको छ। एजेन्सी