पाल्पा । रैनादेवी छहरा गाउँपालिका–८, सत्यवती जरेङमा घर गोठमा आगलागी हुँदा जलेर नष्ट भएको छ । 

रैनादेवी, छहरा–८ सत्यवती जरेङका ओमबहादुर गाहाको घर र गोठमा आज बिहान आगलागी भएको हो । आगलागीबाट गाहाको एकतले खरले छाएको घर र गोठ जलेर नष्ट भएको छ । आगलागी हुँदा अन्नपात, लत्ताकपडा, गरगहना, महत्वपूर्ण कागजात र गोठमा रहेका दुईवटा बाख्रा, एउटा गोरु र एउटा गाई जलेको छ । 

करिब रु चार लाख ५० हजार बराबरको क्षति भएको जिल्ला प्रहरी कार्यालय पाल्पाले जनाएको छ । स्थानीय बासिन्दाको पहलका कारण आगलागीबाट कुनै मानवीय क्षति हुन पाएनन् ।