काठमाडौ । लागूऔषध नियन्त्रण व्यूरोले उपत्यकाका विभिन्न ठाउँबाट लागूऔषधीसहित दुई जनालाई पक्राउ गरेको छ ।

व्यूरोको टोलीले भारतको मोटिहारी थाना रक्सौल घर भएका ३७ वर्षीय रमेश कुमारलाई लागूऔषधसहित पक्राउ गरेको हो । कुमारलाई काठमाडौं महानगरपालिका १४ कलंकीबाट प्रक्राउ गरिएको प्रहरीले जनाएको छ ।

भारतीय नम्बरको बिआर ५ टिएमपि २०१७ ९७ को सेतो रंगको स्कोर्पियो गाडीको पछाडि सिटमा लुकाइछिपाइ राखेको बुप्रिनर्फिन १२ सय एम्पुल, डाईजेपाम १२ सय एम्पुल र फेनारगन ११ सय एम्पुल लागूऔषधसहित कुमारलाई प्रहरीले पक्राउ गरेको हो । कुमारले विगत लामो समयदेखि नेपाल भारत सीमाबाट बुप्रिनर्फिन, डाईजेपामलगायतका नियन्त्रित लागूऔषध ओसार पसार गर्दै आइरहेका प्रहरीले जनाएको छ ।

त्यसैगरी, नागढुंगा प्रहरीले ललितपुरको इमाडोलका २६ वर्षीय संदिप थापालाई लागूऔषध गाँजासहित पक्राउ गरेको छ । धादिंगबाट काठमाडौं आउँदै गरेको बसमा चेकजाँचका क्रममा झोलामा लुकाइछिपाइ राखेको १ केजी ५ सय ग्राम गाँजासहित उनी पक्राउ परेका हुन । यस सम्बन्धमा प्रहरीले आवश्यक अनुसन्धान गरिरहेको जनाएको छ ।