सोल । उत्तर कोरियाली सैनिकलाई चेतावनी दिन दक्षिण कोरियाली सेनाले गोली चलाएको छ । आफ्नो देशबाट भागेका एक सैनिकको खोजी गरिरहेको उत्तर कोरियाली सैनिकलाई चेतावनी दिन दक्षिण कोरियाली सेनाले गोली चलाएको हो । दक्षिण कोरियाका सीमारक्षकहरुले उत्तरका सैनिकलाई तर्साउन २० राउड गोली प्रहार गरेको बीबीसीले जनाएको छ ।

स्थानीय समयअनुसार बिहीबार करिब ८ बजे उत्तर कोरियाली एक सैनिक दक्षिण कोरिया छिरेका थिए । बाक्लो कुहिरोका बीच ती सैनिक दक्षिण कोरिया छिर्न सफल भएका थिए ।

यता दक्षिण कोरियाले भागेका सैनिकलाई पक्राउ गरी सोधपुछ गरिरहेको दक्षिण कोरियाले जानकारी दिएको छ । यो वर्ष उत्तरबाट भाग्ने सफल उनी चौँथो सैनिक रहेको बताइएको छ ।