पशुको आहारा खाने लालु जेलमा
पटना। बिहारका पूर्वमुख्यमन्त्री तथा राष्ट्रिय जनता दलका प्रमुख लालुप्रसाद यादवलाई ‘देवघर चारा घोटाला’ प्रकरणमा भारतको सीबीआइ अदालतले शनिबार दोषी रहेको ठहर गरेको छ ।
सीबीआइको विशेष अदालतले बिहारका पूर्वमुख्यमन्त्री लालु यादवलाई दोषी ठहर गरेपछि विहार प्रहरीले उनलाई पक्राउ गरी होटवार जेल चलान गरिएको छ ।
अदालतले बहुचर्चित देवघर चारा घोटालामा नेता यादवलाई दोषी प्रमाणित गरेपनि उनलाई कस्तो सजाय हुने भन्ने आगामी जनवरी ३ मा फैसला हुने बताएको छ ।
अदालतले उनीसहित अरु १५ जनालाई देवघर चारा घोटालामा दोषी ठहर्याएको भारतीय सन्चारमाध्यमहरुले उल्लेख गरेका छन् । अदालत परिसरमा जम्मा भएका उनका कार्यकर्ता तथा समर्थकले केन्द्रीय सरकार तथा सत्तारुढ भारतीय जनता पार्टी बिजेपीविरुद्ध नाराबाजी गरेका थिए ।
सन् १९९० देखि १९९४ बीचमा देवघर कोषगारबाट पशुलाई उपलब्ध गराइने दानामा ८९ लाख २७ हजार भारतीय रुपैयाँ अवैध ढंगले निकालेको आरोप यादवमाथि लागेको थियो । त्यस समय उनी बिहारका मुख्यमन्त्री थिए । अहिले यस घोटालामा करिब ९ अर्ब ५० करोड भारतीय रुपैयाँ हिनामिना भएको सीबीआइले उल्लेख गरेको छ ।
सन् १९९७ अक्टोबर २७ मा सीबीआइले लालुसहित ३८ जनाविरुद्ध विशेष अदालतमा मुद्दा दर्ता गरेको थियो ।
