नेपालीका लागि करोडौं सहयोग जुटाउने समाजसेवी लामिछाने राजदुतको रवैया सम्झिएर मन्त्रीका सामू भक्कानिए
केही महिना पहिले अमेरिकाको ओक्लोहमामा एक नेपाली युवतीको निधन भयो । निशा कार्की आफ्नै बलबुतामा नर्सिङ पढ्न गएकी थिइन् । धादिङकी निशाले सानैमा बुबा गुमाएकी थिइन्, काठमाडौंमा आमाले मजदुरी गर्थिन् । एक्ली छोरीको निधन भएपछि कल्पना कैयौँ दिनसम्म अर्धचेत रहिन् । नेपाली समाज टेक्सासका अध्यक्ष कृष्ण लामिछानेका सहोदर भाइ अमेरिकामा गनेचुनेका नेपाली वैज्ञानिक थिए । कोलम्बियामा बस्ने उनका भाइलाई सडकपेटीमा उभिइरहेको बेला सडकबाट हुर्रिदै आएको गाडीले ठक्कर दियो । उनको निधन भयो । निशाको निधन हुँदा कृष्ण पारिवारीक पीडामा थिए ।
निशालाई सानैदेखि चिनेका कृष्णको मन थामिएन । आफ्नो पीडा भुलेर निशाकी आमाको सहयोगार्थ अभियान थाले । कृष्ण र अन्य सहयोगीको अभियानले रातारात लाखौँ उठायो । संकलित झण्डै ४५ लाख रुपैयाँ रकम हस्तान्तरण गर्नका लागि आइतबार साँझ ठमेलमा कार्यक्रम आयोजना गरियो । होली हिमालय ट्रष्टद्वारा आयोजित कार्यक्रममा निशाकी आमाको रोदनले माहोल भावपूर्ण थियो ।
सिंचाई मन्त्री दीपक गिरीको प्रमुख आतिथ्यमा भएको कार्यक्रममा एनएसटीका अध्यक्ष लामिछानेले सहयोग संकलन गर्दाको अनुभव सुनाए । मन्तव्यका क्रममा उनी भक्कानिए, ‘मेरो आफ्नै भाइ मर्यो । धेरैतिर सो घटना समाचार बन्यो । निशा मरिन् । नेपाली सबै लागेर सहयोग जुट्यो । टेक्सासमा मात्र दर्जन व्यक्तिले पछिल्लो केही महिनामा ज्यान गुमाए । नेपालीले सहयोग जुटाउँदै आएका छौँ । तर, यस्तो पीडा हुँदा पनि राजदुतले एक कल फोन गरेर सान्त्वनासमेत दिँदैनन् । नेपालमा कुनै अमेरिकीको निधन भए यहाँका राजदुतले के गर्छन ? मन्त्रीज्यू यस्ता राजदुतलाई हाम्रो तिरोबाट किन तलबभत्ता दिने ?’ लामिछानेको अभिव्यक्तिले हलमा सन्नाटा छायो । मन्त्री गिरीले राजदुतको व्यवहारका सम्बन्धमा मन्त्रिपरिषद्मा कुरा उठाउने बताए ।
नेपालीले नेपालीलाई गरेको सहयोग उदाहरणीय
पछिल्लो समय नेपालीले अनलाइन सहयोग अभियानलाई तीब्रता दिने गरेका छन् । कसैलाई केही परिहाले अनलाइन कोष खडा गर्ने र विश्वभरका नेपालीबाट सहयोग जुटाउने गरिएको छ । टेक्सास नेपाली समाजले यसका लागि उदाहरण प्रस्तुत गरेको कार्यक्रमका वक्ताहरुको भनाइ थियो । अमेरिकाबाट नेपालमा शब पठाउने देखि पीडित परिवारको भरणषोषणका लागि खर्च जुटाउने सन्दर्भमा एनएसटी सक्रिय रहेको छ । एनएसटीले भूकम्पका बेला करोडौं रकमको राहत जुटाएको अध्यक्ष लामिछानेले जानकारी दिए । एनएसटीकै भूकम्प प्रभावित विभिन्न ठाउँमा विद्यालय निर्माण भइरहेको छ । एनएसटीले टेक्सासमा नेपाली पाठशाला र पशुपति मन्दिरको संचालन गरेको छ ।
र योपनी,
► अमेरिकामा नेपाली युवतीकाे निधन
► अर्धचेत कल्पना बरबराइरहेकी छिन्, ‘मेरो बिन्ती ! छोरी निशाको मुख हेर्न देऊ’ [भिडियोसहित]
dallas nepali society krishna lamichhane Nisha Karki
