मौसमका कारण उडान सेवा प्रभावित
चैत्र - १७ । खराब मौसमका कारण पोखरा विमानस्थलको उडान सेवा प्रभावित भएको छ ।
मौसममा आएको परिवर्तनसँगै भिजिविलिटी पर्याप्त नहुँदा पोखराबाट हुने सबै उडान प्रभावित भएको विमानस्थल कार्यालयका प्रशासकीय अधिकृत काशीनाथ पौडेलले जानकारी दिए ।
खराब मौसमका कारण हिजोका केही उडान र आज बिहानका सबै उडान पनि प्रभावित भएको उनले बताए । हिजो पोखराबाट हुनुपर्ने बुद्ध एयरका छ वटा उडानमध्ये एक मात्र उडान भएको थियो भने यति एयरका आठ वटामध्ये तीन वटा उडान भएको थियो ।
त्यस्तै सिम्रिक एयरको हिजो हुनुपर्ने तीनमध्ये दुई वटा मात्र उडान भएको पौडेलले जानकारी दिए । आज पनि जोमसोमको लागि तय भएका सिम्रिक र तारा एयरका तीनरतीन उडान हुन सकेको छैन ।
आज बिहान ११.०० बजेसम्म पोखराबाट काठमाडौँका लागि हुनुपर्ने कुनै पनि उडान हुन नसक्नुका साथै दृश्यावलोकनका लागि उड्ने गरेको अल्ट्रालाइट सेवा र सराङकोटबाट हुने प्याराग्लाइडिङ समेत प्रभावित हुँदा पर्यटक समस्यामा परेका छन् ।
पोखरा विमानस्थल
