चैत्र २२ । सप्तरीको हनुमानगर बजारमा जंगली हात्तीको आक्रमणमा परी मंगलबार २ जनाको मृत्यु भएको छ भने ५ जना घाईते भएका छन् । हात्तीको आक्रमणवाट हनुमाननगर ४ का २५ वर्षिय रोशन झा र हनुमान साफीका छोरा २५ वर्षिय संजय साफिको मृत्यु भएको हो । पुरानो सदरमुकाम हनुमाननगर बजारमा बिहान एउटा जंगली हात्ती प्रवेश गरी आतंक मच्चाएको थियो । सो क्रममा हात्तीको आक्रमणमा परि हनुमाननगर बजारका संजिव साह, नविना खातुन, संजय साफी, कालिचरण साह, रोसन झा र वसन्त मण्डल घाईते भएका थिए । घाइतेमध्ये संजय, रोसन र कालिचरणको अवस्था चिन्ताजनक भएपछि उपचारका लागि विपी कोईराला स्वास्थ्य विज्ञान प्रतिष्ठान धरान पठाईएको छ । रोसन र संजयको उपचारकै क्रममा मृत्य’ भएको सप्तरीका एसपी अनुराग द्विवेदीले जानकारी दिए । बाँकी घाईतेको राजविराज स्थित सगरमाथा अञ्चल अस्पतालमा उपचार भईरहेको छ । उज्यालो भएपछि पसेको जंगली हात्तीले स्थानीयवासीलाई लखेटेर आक्रमण गरेको हो । प्रहरी र स्थानीयको सहयोगमा हात्तिलाई कोशी ब्यारेजतर्फ लखेटिएको जिल्ला प्रहरी कार्यालय सप्तरीले जानकारी दिए ।