टेलिफोन टावर बनाउनेलाई भोट
दीपबहादुर घर्ती
जाजरकोट, बैशाख - १ । साविकको रग्दा गाविस ४ रोलीका नरबहादुर ध्यार स्थानीय निकायको पुर्नसंरचनापछि नगरबासी भएका छन् । अहिले उनी त्रिवेणीनलगाड नगरपालिकाका स्थायी बासिन्दा हुन् । तर, उनको गाँउमा न त विद्युत सेवा छ न संचार सुविधा नै । जाजरकोट डोल्पा बाटोले गाँउलाई छोएको भएपनि नियमित र भरपर्दो यातायात सेवा संचालनमा छैन । ‘गाँउमा टेलिफोनको टावर नहुँदा फोनले काम गदैन । टेलिफोन गर्न चार घण्टा पैदल हिडेर रुकुमको राडीबजार जानु पर्छ’ ध्यारले भने, 'त्यसैले हाम्रो समस्या बुझ्ने र तत्काल टेलिफोनको टावर बनाउन पहल गरिदिने नेता र पार्टीलाई भोट दिन्छौ।’ जिल्लाको त्रिवेणीनलगाड नगरपालिकाका रग्दा, रोली , चौखा गाँउमा न त टेलिफोनले काम गर्छ न त आमसंचारका कुनै साधनले काम गर्छन् । पत्रपत्रिका र टेलिभिजनको त कुरै छोडौ ति गाँउमा रेडियो सम्म सुनिदैन । यी तिन ओटा गाँउमा एफएम रेडियोको पहुँच समेत छैन । चौखाका किशोर मल्लले भने एनटिसी, स्काई र एनसेल कुनै पनि फोनले काम गर्दैनन् । फोन सुविधा नहुँदा ति गाँउका स्थानिय निकै मर्कामा परेका छन् । शहर तथा विदेशमा रहेका आफन्तलाई सम्पर्क गर्नु परे एक कल फोन गर्न आतेजाते गरी ४ सय रुपैया खर्चेर रुकुमको राडीबजार गएर फोन गर्नु पर्ने बाध्यता रहेको छ । टावर निर्माणका लागि राजनैतिक दलका नेता देखि सम्वन्धित निकायमा अनुरोध गर्दा पनि सुनुवाई नभएको मल्लले बताए । उनले यसपटकको स्थानिय तहको निर्वाचनमा जसले हाम्रो मागलाई सम्बोधन गर्छ त्यसैलाई जिताउँछौ । जुन नेता र पार्टीले विश्वास दिलाउँछ पूरै गाँउलले त्यही पार्टीलाई भोट हाल्ने निर्णय भएको उनले बताए । गत संविधान सभाको निर्वाचनमा काँग्रेस, एमाले, माओवादी केन्द्रलगायतका पार्टीका उम्मेदवारले यहाँको टेलिफोन समस्या समाधानका लागि टावर निर्माणमा आवश्यक पहल गर्ने प्रतिवद्धता गरेका थिए । 'माओवादी केन्द्रबाट उम्मेद्धवार भएका शक्तिबहादुर बस्नेत गृहमन्त्रीसम्म भए तर, उनले समेत फर्केर हेरेनन्' रोलीकी माया रावतले भनिन् । चुनावपछि कुनै पनि नेता ति गाँउ गएका छैनन् । रग्दा गाँउमा ६०, रोली गाँउमा ९१ र चौखा गाँउमा स्वास्थ्य चौकी, विद्यालय, प्रहरी चौकी, खाद्य डिपो सहित ४५ घर छन् तर, ति गाँउमा टेलिफोन र संचारका कुनै पनि साधनले काम नगर्दा स्थानिय समस्यामा परेका छन् । आन्तरिक संचारदेखि देशविदेशका खवर लिनबाट बञ्चित हुनु परेको स्थानियको गुनासो छ । ठुली भेरीको किनारमा रहेका ति गाँउको पाल्लोपट्टी रुकुमको गोतामकोटको ठुलो पहाड पर्छ भने यतापट्टी रग्दाकै ठुलो पहाड पर्छ खोचमा भएकाले संचारका कुनै पनि साधनले काम नगर्ने स्थानियको भनाई छ । जाजरकोट डोल्पा सडक खण्डमा पर्ने सुन्दर ती गाँउमा संचार सुविधाको विकास गर्न र विद्युत सेवाको स्थानियले माग गरेका छन् ।
