चन्द्रागिरि–१० र ११ मा एमाले विजयी
काठमाडौँ : चन्द्रागिरि नगरपालिकाको पछिल्लो मतगणनानुसार वडा नं १० र ११ मा नेकपा (एमाले) का समूह विजयी भएका छन् ।
वडा नं १० का वडाध्यक्षमा गोपालकृष्ण महर्जन ६९९ मत प्राप्त गरी विजयी भएका छन् । उनका निकटतम प्रतिद्वन्द्वी नेपाली काँग्रेसका पञ्चबहादुर महर्जनले ४७८ मत प्राप्त गरेका छन् । सदस्यमा सीता महर्जन, कान्छी नेपाली, मनोजकुमार महर्जन र भेषनाथ उपाध्याय निर्वाचित भएका छन् ।
वडा नं ११ का वडाध्यक्षमा हरिभक्त महर्जन ३५७ मत प्राप्त गरी विजयी भए । उनका निकटतम प्रतिद्वन्द्वी स्वतन्त्र उम्मेदवार गौतम श्रेष्ठले ३१४ मत प्राप्त गरे । सदस्यमा कृष्णदेवी महर्जन (प्रजापति), राधिका मिजार सार्की, पूर्णगोपाल श्रेष्ठ र तीर्थराज काफ्ले निर्वाचित भएका छन् ।
प्रमुखको मतगणनामा हालसम्म काँग्रेसका घनश्याम गिरीले आठ हजार ८४१ र एमालेका प्रह्लाद कार्कीले छ हजार ३०४ मत प्राप्त गरेका छन् । हालसम्म उपप्रमुखमा काँग्रेसका इन्द्रावती श्रेष्ठले सात हजार ३१३ र एमालेका लीसा नकर्मीले सात हजार ५५ मत प्राप्त गरेको निर्वाचन कार्यालयका कम्प्युटर अधिकृत दिवस भट्टराईले जानकारी दिए ।
कुल १५ वडा रहेको नगरपालिकामा ३८ हजार ८७२ मतदाता रहेको सो नगरपालिकामा ३१ हजार ९२० मत खसेको थियो । वडा नं १३ को मतगणना जारी छ ।
एमाले चन्द्रागिरि नगरपालिका
