हवाई कारबाहीमा सात आइएस आतङ्ककारी र एक प्रहरीको मृत्यु
काबुल । अफगानिस्तानको पूर्वी प्रान्त नान्गाहारमा आइतबार भएको हवाई कारबाहीमा परी सात इस्लामिक स्टेट्स (आइएस) आतङ्ककारी मारिएका अफगान रक्षा मन्त्रालयले सोमबार जानकारी दिएको छ ।
नान्गाहार प्रान्तको आचिन जिल्लामा घेरा हालेर गरिएको यस हवाई कारबाहीमा परी सात आइएस लडाकू मारिनुको साथै अन्य केही घाइते भएका सो मन्त्रालयले ट्वीटरमार्फत जानकारी दिएको छ ।
अफगानिस्तानको राजधानीबाट १२० किलोमिटर पूर्वमा रहेको यस प्रान्तमा आइएस लडाकू समूहको बलियो प्रभाव रहेको पाइन्छ । यस युद्धग्रस्त देशमा अफगान सेना र प्रहरीले संयुक्त रुपमा आइएस तालिवान आतङ्ककारीविरुद्ध कारबाही गर्दै आएका छन् ।
यद्यपी प्रत्याकर्मण स्वरुप तालिवान र आइएस लडाकूहरुले सुरक्षाबललाई लक्षित गर्दै भीषण बम आक्रमण गर्दै आतङ्क मच्चाउँदै आएका छन् ।
सोमबार बिहान सवेरै कान्दाहार प्रान्तको प्रान्तीय राजधानी कान्दाहार सहरमा आतङ्ककारीले गराएको विस्फोटक पदार्थ विस्फेटनमा परी एक प्रहरी अधिकारीको मृत्यु हुनुको साथै अन्य एक घाइते भएका जनाइएको छ ।
