भारत हुँदै साउदी अरब जान लागेका ६ जना महिलाको उद्धार
साउदी अरब लानका लागि भारततर्फ जाँदै गरिएका ६ जना महिलालाई प्रहरीले उद्धार गरेको छ ।
प्रक्रिया नै नपुर्याई भारत हुँदै साउदी अरब जान लागेकी ६ जना महिलालाई नेपाल प्रहरीले धादिङको धार्केबाट बुधबार राति उद्धार गरेको हो ।
उद्धार गरिएका महिलालाई आवश्यक परामर्शका लागि माइती नेपालको जिम्मा लगाएको इलाका प्रहरी कार्यालय खानीखोलाका प्रहरी निरीक्षक जीवन निरौलाले बताए ।
साउदी अरबमा काम लगाइदिने भनेर एकआपसमा चिनजान नै नभएका महिलालाई धार्केसम्म बोलाएर बुटवलका लागि गाडी चढ्न लागेका बेलामा शंका लागेर सोधपुछ गर्दा प्रहरीले उनीहरुलाई पक्राउ गरेको थियो ।
उद्धार गरिएकामहिलासंगै रहेका दाङ घोराहीका ३५ वर्षीय प्रसाद विश्वकर्मा, इलामका ३० वर्षीया सुमन पाँचकोटे र तेह्रथुमका ३७ वर्षीया शर्मिला कुमारी संकटालाई समेत प्रहरीले पक्राउ गरेका छन् । उनीहरु साउदी अरबबाट बिदामा आएको बताएका छन् । उनीहरुबारे अनुसन्धान भइरहेको प्रहरी निरीक्षक निरौलाले जानकारी दिए ।
उद्धार गरिएका ६ जना महिलासमेत सबै माइती नेपालको जिम्मामा रहेको माइती नेपालका पदम बस्नेतले टेलिफोनबाट जानकारी दिए ।
पुरुषलाई महिलाले नचिनेको र छुट्टाछुट्टै गाडीमा धार्के आएर भेट भएपछि बुटवल हुँदै भारत जाने तयारी गरिरहेको अवस्थामा शंका लागेर प्रहरीले उनीहरुलाई पक्राउ गरेको र थप अनुसन्धानका लागि माइती नेपालले गौशालास्थित केन्द्रीय कार्यालयमा पठाइएको जनाएको छ ।
female
