काठमाडौं । कान्तिपुर पब्लिकेशनका प्रबन्ध निर्देशक कैलाश सिरोहियाले आफूविरुद्ध ‘ब्ल्याकमेलिङ’ गरेको भन्दै व्यवसायी अजेयराज सुमार्गीले सोमबार पत्रकार सम्मेलन गरे ।

 

आक्रोशित मुद्रामा प्रस्तुत भएका उनले कान्तिपुरको ‘दादागिरी’ र त्यसविरुद्ध बोल्न उपस्थित भएको बताएका थिए ।

पत्रकार सम्मेलनको क्रममा उनले कैलाश सिरोहियालाई एक ‘अपराधी’को रुपमा समेत ब्याख्या गरे ।

 

पछिल्लो समय आफ्नो बारेमा भ्रामक समाचार पटक पटक प्रकाशन गर्दैआएकोले यसपटक सार्वजनिक रुपमा सत्य बोल्न बाध्य भएकाले सम्मेलन गरेको सुमार्गीको भनाइ थियो ।

 

व्यवसाय गर्नेहरुसँग अचेल ‘गोल्डेन शेयर’ लिने चलन रहेको प्रसंग ल्याउँदै सिरोहियाले पनि आफूसँग ‘गोल्डेन शेयर’ मागेको तर नदिएपछि विरुद्धमा लागेको सुमार्गीको दाबी छ ।

 

उनले व्यंग्यात्मक शैलीमा भने, ‘मसँग पनि गोल्डेन शेयर मागेका न हुन् । के अपराध गरेका हुन् र ! मैले नदिएपछि मेरोविरुद्ध लागे ।’

 

 

सिरोहियाको यो एक प्रबृत्ति भएको र यस्तो घटनालाई ५० औं वर्षपछि पनि पत्रकारिता पढ्नेले अध्ययन गर्नुपर्ने एक दुखद् अवस्थाको रुपमा उनले ब्याख्या गरेका छन् ।

 

उनले भने, ‘यो ब्ल्याकमेलिङ प्रकरण ५० औं वर्षसम्म चर्चाको विषय बन्नेछ । पत्रकारिता अध्ययन गर्नेले पढ्नैपर्ने विषय बन्नेछ ।’

 

कान्तिपुर मिडियाले आफूलाई जोड्दै डेरामा बसेको मान्छेले सम्पत्ति कमाउन सक्दैन भन्ने मानसिकता विकास गरिदिएको भन्दै त्यसप्रति सुमार्गीले दुख व्यक्त गरे ।

 

त्यस प्रसंगमा सुमार्गी डेरामा बस्ने मान्छेप्रति अपमान गरेको भन्दै कान्तिपुरविरुद्ध आक्रोशित बनेका थिए ।

 

‘डेरामा बस्ने मान्छेले कमाउँदैन ?’ उनले भने, ‘म कुनै चिठ्ठा परेको मान्छे हैन ।’ उनले सम्मेलनको सुरुमै २०२९ सालदेखि नै आफ्नो परिवार व्यवसायमा जोडिएको भन्दै कान्तिपुरले दम्भ र घमण्ड देखदाएको बताएका थिए ।

 

सुमार्गीका अनुसार कान्तिपुर मिडिया ग्रुप र सुमार्गीको मुक्ति श्री प्रा.ली बीच जग्गाको विषयलाई लिएर यति लामो विवाद भएको हो ।

सुमार्गीले सिरोहियाको ‘ब्ल्याकमेलिङ प्रकरण’ लाई उदांगो पार्न पत्रकारहरुलाई समेत आग्रह गरेका छन् । पत्रकारहरुले पनि उनको प्रबृत्तिलाई निरुत्साही गर्नुपर्ने भन्दै अन्यथा अप्ठ्यारो पार्नसक्ने उनले बताए ।

 

विदेशबाट लगानी ल्याउने सन्दर्भमा पत्रकारको जिज्ञाशामा जवाफ दिँदै सुमार्गीले पत्रकारहरुलाई समेत व्यंग्य गरेका थिए । उनले व्यंग्यात्मक रुपमा भने, ‘तपाईँहरु सतहमा बगिदिएपछि मलाई त रुन आउँछ ।’

 

सुमार्गीले सोल्टी होटलमा सिरोहियासँग रक्सी खाँदाको प्रसंग देखि जग्गा खरिद प्रकरणबारे खुलेर बोलेका छन् । यसबाहेक उनले सिरोहियाको गतिविधिप्रति आक्रोशित हुँदै भने, ‘संचारमाध्यम जस्तो साधनलाई बदनामीको हतियार बनाउँदै निन्दनीय काम गर्नुभएको छ । यो ब्ल्याकमेलिङ नै हो ।’

 

सिरोहियाले गरेको कामलाई उनले पटक पटक ‘ब्ल्याकमेलिङ भन्दै आवेगमा आएर उनलाई ‘अपराधी’, ‘कुत्ता’ जस्ता शब्द प्रयोग गरेका छन् ।

 

साथै उनले कान्तिपुरले जानकारी नदिएरै भ्रामक समाचार छापेको लगायत विषयलाई लिएर कान्तिपुर विरुद्ध २५ करोड क्षतिपुर्ति माग गर्दै मुद्धा दायर समेत गरेको बताए ।