बाजुरा । जिल्लाको बडिमालिका नगरपालिकाका प्रमुख प्रशासकीय अधिकृत त्रिलोक चन्द्रमाथि अज्ञात समूहले कुटपिट गरेको छ। गएराती १० बजेपछि सुतिरहेको बेला ढोका फोडेर उनीमाथि आक्रमण भएको प्रहरीले बताएको छ । 

 

 

वडा अध्यक्ष प्रकाश रावलले कुरा गर्न खोजेकाले ढोका खोल्न आग्रह गर्दा सुतिसकेको र भोलि कुरा गरौंला भन्दा एकाएक ढोका फोडेर कुटपिट गरिएको चन्द्रले बताए।

 

 

कुटपिट गर्दा एक जनाको घडी समेत उनको कोठामै खसेको अवस्थामा फेला परेको प्रहरीले जनाएको छ। तीन जनाको संख्यामा आएका अपरिचत व्यक्तिले ढोका फोडेर एकाएक कुटपिट गरेको चन्द्रले बताए। चन्द्रमाथि ढोका फोडेरै कुटपिट गरिएको नगर प्रमुख पदम बडुवालले जानकारी दिए ।

 

 

जिल्ला बाहिर जाने कार्यक्रम भएकोले अधिकृतको कोठामा नौ बजेसम्म छलफल भएको जानकारी दिँदै बडुवालले आक्रमणकारीले सुरुमा आफ्नो घरमा गएर आफुलाई खोजेको र आफुलाई नभेटेपछि अधिकृतको ढोका फोडेर कुटपिट गरेको हुनसक्ने बताए । 

 

 

कार्यपालिका भित्र सामान्य मतभेद रहेपनि आक्रमण नै गर्ने विवाद नभएकोले घटना बारे आफुलाई जानकारी नभएको बडुवालको भनाई छ।

बडिमालिका नगरपालिका प्रमुख प्रशासकीय अधिकृत