फिजीमा आमनिर्वाचनको तयार
सुभा । फिजीमा अगामी नोभेम्बर १४ मा हुने आमनिर्वाचनका लागि ६ लाख ३७ हजार ५ सय २७ नागरिकले मतदाता नामावली सूचीमा नाम दर्ता गरेका छन् ।
फिजीको निर्वाचनका पर्यवेक्षक मोहमद सनिमले सोमबार मतदाता नामावलीमा ३ लाख १६ हजार ४ सय ३१ महिला र ३ लाख २१ हजार ९६ जना पुरुषले मतदाताका रुपमा दर्ता गरेका बताएका छन् ।
त्यसैगरी विदेशमा रहेका ७ हजार ९ सय ७० फिजीका नागरिकले पनि आफ्नो नाम मतदाता नामावलीमा दर्ता गराएका सरकारद्धारा सञ्चालित एक रेडियोलाई उद्धृतगर्दै सनिमले बताए ।
सो निर्वाचनको लागि ७ लाख ६४ हजार ९ सय मतपत्र छपाइएको पनि सनिमले थप जनाकारी दिए । मतदानका लागि ८ सय ५४ मतदान केन्द्र स्थापना गरिने बताइएको छ ।
फिजीमा पछिल्लो पटक सन् २०१४ को आमनिर्वाचन भएको थियो । आसन्न निर्वाचनको व्यापक तयारी भइरहेको फिजीको निर्वाचन आयोगले जनाएको छ ।
