ए डिभिजन लिग : संकटाको अपराजित यात्रामा आर्मीले लगायो ब्रेक
काठमाडौं । शहीद स्मारक ए डिभिजन लिग अन्तर्गत सोमबार भएको खेलमा त्रिभुवन आर्मी क्लबले संकटा क्लबलाईपराजित गरेको छ । हालसम्म अपारजित यात्रा तय गरेको संकटालाई ब्रेक लगाउने क्रममा आर्मीले ४–१ गोलले हराएको हो । सातदोबाटोस्थित एन्फा मैदानमा भएको खेलमा आर्मीको जितमा टेकबहादुर बुढाथोकीले दुई गोल गरे ।
सुरुवाति तीन खेलमा निकै प्रभावशाली प्रदर्शन गरेको संकटा आर्मीविरुद्ध भने निकै फितलो रह्यो । त्यसो त संकटाले एक गोलको अग्रता जोगाउन सकेन । खेलमा सुरुवाती अग्रता लिएको संकटाका लागि विदेशी खेलाडी इलोन म्याक्सवेलले गोल गरेका थिए । उनले खेलको ९ औं मिनेटमा गोल गरेका हुन् । तर , खेलको १७ औँ मिनेटमा आर्मीले खेल बराबरी गर्यो । आर्मीका लागि टेकबहादुर बुढाथोकीले गोल गरे ।
निक्कै प्रतिस्पर्धात्मक बनेको खेलमा आर्मीका लागि थप गोल ३० औं मिनेटमा भरत खबासले गरे । दोस्रो हाफमा निक्कै आक्रमक बनेको खेलमा संकटाले पेनाल्टी पायो । दोस्रो हाफको सुरुवातमा नै पेनाल्टीको अवसर पाएको संकटाका लागि अमित तामाङले पेनाल्टीमा गोल गर्न सकेनन् ।
खेलको ६३ औँ मिनेटमा सन्तोष तामाङले फ्रिकिकमार्फत उत्कृष्ट गोल गर्दै आर्मीलाई तीन –एकको अवस्थामा पुर्याए । त्यसपछि ६६ औँ मिनेटमा आर्मीले चौथो गोल थप्यो । उसका लागि फेरि टेकबहादुर बुढाथोकीले गोल गरे । त्यसपछि खेलको ७७ औँ मिनेटमा दिनेश हेम्जनले आर्मीका लागि पाँचौं गोल गरे ।
जितसँगै आर्मीले चार खेलबाट १० अंक बनाउदै शीर्ष स्थानमा उक्लिएको छ ।
तस्विरः एन्फा
