काठमाडौं । अब छिट्टै मेलम्चीको पानी आउला र तिर्खा मेटाउँला भनी बसेका काठमाडौंबासीलाई दुःखको अर्को खबर छ । त्यो योजनासँग सम्बद्ध ठेकेदारहरुले बिलम्ब शुल्कको नाममा ३५ करोड मागेकोमा नपाएपछि ३२ जना त्योसँग सम्बद्ध इटालियन, कोलम्बियन, फिलिफिनो, दक्षिण अफ्रिकी र चिनियाँ इञ्जिनियर, अधिकृतहरु आइतबार आइतबार नेपाल छाडेर आआफ्नो देशतिर लाखापाखा लाग्दै थिए ।

 

उनीहरुलाई विमानस्थलबाट राति नै फर्काई अस्ति सोमबार र मंगलबार दिनभर खानेपानी मन्त्रालयमा वार्ता गरेर थामथुम पारिएको छ । इटालीमा यही मेलम्ची परियोजना बनाउने सिएमसी कम्पनी टाट पल्टेर त्यसको १०० रुपैयाँ मूल्य बराबरको शेयर २ रुपैयाँमा झरेपछि यता पनि निहुँ खोजेको अवस्था हो ।

 

उनीहरु पटकपटक म्याद सार्दै, निर्धारित समयमा काम नसकी यो वा त्यो बहानामा नेपाल सरकारसँग शुल्क उठाउँदै आएका थिए । यसको पराकाष्टाचाहिँ उनीहरु कामै छोडेर भाग्न लाग्दा आइतबार मध्यराति प्लेन चढ्न नदिइकन एकजना अध्यागमनबाट र बाँकि ठमेलको होटलबाट विमानस्थलतर्फ जाँदाजाँदै फर्काइएका हुन् । यो समाचार जन आस्था साप्ताहिकबाट लिइएको हो ।