काठमाडौं । दुई साता लामो पोखरा भ्रमणमा निस्केका पूर्वराजा ज्ञानेन्द्र शाहले आउँदो शनिबार विन्ध्यवासिनी मन्दिरको दर्शन गर्ने भएका छन् । पोखरावासीको न्यानो मायाकोको स्वागत पाएका पूर्वराजा शाहको विन्ध्यवासिनी मन्दिर दर्शन कार्यक्रमलाई व्यवस्थित बनाउन र सुरक्षा प्रबन्धमा सहयोग गर्न राजसंस्था पक्षधर शिव सेना नेपालले आफ्नो तयारीहरु शुरु गरेको छ । 

 

गत शनिबार पोखरा गएका शाहको स्वागतमा राजसंस्था पक्षधर नागरिकहरुले ‘राजा आऊ देश बचाऊ’, ‘गणतन्त्र चाहिँदैन, देश बेच्न पाइँदैन’ जस्ता नाराहरु लगाएका थिए । कतिपय नागरिकहरु पूर्वराजासँग अंकमाल नै गर्न पुगेका थिए । 

 

शिव सेना नेपालका अध्यक्ष अनिल बस्नेत ‘बाबा’का अनुसार नेपाली जनता र नेपालको राजसंस्था दुवै एक अर्काका परिपुरक हुनुको नाताले पूर्वराजाले यसपटक स्थानीय नागरिकहरुसँग सौहाद्र वातावरणमा भलाकुसारी गरे । जनताका गुनासो, सुखदुःख जान्ने प्रयास पनि पूर्वराजाले गरेका थिए ।