काठमाडौं । शहीद स्मारक ए डिभिजन लिग फुटबलमा मछिन्द्र क्लबले पहिलो जित हात पारेको छ ।

शुक्रबार ललितपुरको सातदोबाटोस्थित एन्फा कम्प्लेक्सको खेल मैदानमा भएको खेलमा मछिन्द्रले सस्वती युथ क्लबललाई ४–२ गोल अन्तरले हराएको हो । जीतसँगै मछिन्द्रले तीन अंक बटुल्न सफल भएको छ । 

मछिन्द्रको जितमा विशाल राई, भासाडिया डियामान्डे, अनिल गुरुङ र विकास राईले गोल गरे । यता, सरस्वतीका लागि भने फ्रान्सिस् ओन्येमाले गोल गरे । त्यस्तै खेलमा मछिन्द्र क्लबका सन्जय राजबहाकले आत्मघाती गोल गरेका थिए । 

 

खेलको चौथो मिनेटमा नै आत्मघाती गोलको उपहारबाट सरस्वतीले अग्रता लिएको थियो । खेलको १६ औं मिनेटमा कप्तान विशाल राईले गोल गर्दै मछिन्द्र क्लबलाई १–१ गोलको बराबरी दिलाएका थिए ।

खेलको २० औं मिनेटमा भासाडियाले र २५ औं मिनेटमा अनिलले गोल गर्दै मछिन्द्रलाई ३–१ गोलको अग्रता दिलाएका थिए । ३–१ गोलले पछि परेको सरस्वतीका लागि दोस्रो गोल फ्रान्सिसले गरे । उनले खेलको ३६ औं मिनेटमा गोल गर्दै खेल ३–२ को स्थितिमा पुर्‍याए ।
 

दोस्रो हाफमा पेनाल्टीबाट विकासले गोल गरेपछि मछिन्द्रले सरस्वतीलाई ४–२ गोलअन्तरले पराजित गरेको हो ।