काठमाडौं। प्रमुख प्रतिपक्षी कांग्रेस भ्रातृ संगठन नेपाल तरुण दलले प्रधानमन्त्री केपी शर्मा ओलीलाई एपीएफले दिएको १ लाख डलरको पुरस्कार फिर्ता गर्न आग्रह गरेको छ ।

 

तरुणले मंगलबार विज्ञप्ति जारी गर्दै विवादास्पद संस्थाले दिएको पुरस्कार ग्रहण गरेकोप्रति आपत्ति जनाउँदै फिर्ता गर्न आग्रह गरेको हो ।

 

प्रधानमन्त्री ओलीले विवादास्पद संस्थाले दिएको रकम फिर्ता नगरे देशव्यापी आन्दोलन गर्नेसमेत तरुण दलले चेतावनी दिएको छ । 

 

ओलीले मन्त्रिपरिषद्को स्वीकृतिबिना पुरस्कार ग्रहण गर्नु कानुनविपरीत रहेको तरुण दल महासचिव भूपेन्द्रजंग शाहीले विज्ञप्तिमा उल्लेख गरेका छन् ।

 

तरुण दलले कुनै पनि संस्थाबाट बिनाकारण पुरस्कारका नाममा यति ठूलो रकम ग्रहण गर्नु खुला कमिसन र भ्रष्टाचार भएको आरोप लगाएको छ । 

 

दलले कार्यक्रमको नाममा भएको खर्च पनि छानबिन गर्न सरकारसँग माग गरेको छ । यो समाचार राजधानी दैनिकबाट लिइएको हो । 

नेपाल तरुण दल प्रधानमन्त्री केपी शर्मा ओली