दक्षिण भारतीय केरलाकी एक युवतीको आँखा सन्काउने कलाले अहिले भारत तथा नेपालका सञ्चारमाध्यममा तहल्का मच्चाएको छ।

उक्त भिडियो बनाउने तयारी कसरी भयो, भिडियो बनाउन कति समय लाग्यो र किन यो भिडियो बनाइयो भन्ने विषय अहिले सबैको खुलदुली बनेको छ ।
यसबारे ती युवतीले निर्देशकले अफर गरेअनुसार फरक खालको ‘सट’ दिन लगाएको र आफूलाई पनि यो ‘क्युट’ खालको लागेको बताएकी छन् ।

 

उनले भनिन्, ‘यो भिडियो एकै सटमा बनेको हो, तर मलाई लागेको थिएन कि यो सञ्चारमाध्यम लगायतमा यति धेरै भाइरल बन्छ भनेर। ’उनले यो भिडियो बनाउन आफूले कुनै अभ्याससमेत नगरेको बताएकी छन् । भिडियो भाइरल बन्दै गएपछि उनलाई धेरैले निकै राम्रो भिडियो बनेको प्रतिक्रिया दिएका छन् ।

उनलाई अहिले भारतीय युवालगायत त्यहाँका सञ्चारमाध्यमले ‘करजारे नैनोवाले प्रिया’ को उपनाम दिएका छन् । प्रियाको यस भाइरल भिडियो आउँदै गरेको मलायम सिनेमा ‘ओरो अदार लभ’ को भएको बताइएको छ ।

उक्त भिडियो भाइरल बनेपछि भारतमा यस्तैखाले अन्य भिडियो बनाउनेको बाढी नै आएको देखिएको छ। यद्यपि, अहिले भाइरल भइरहेको यो भिडियो प्रियाको पहिलो भने होइन । यसअघि पनि यिनको यस्तै भिडियो भारतीय सञ्चारमाध्यममा छाइसकेको थियो तर, अहिलेको यस भिडियोले भने तहल्कै मच्चाएको छ।

 
आखिर को हुन् यी युवती जसले सञ्चारमाध्यममा तहल्का मच्चाइन् ?

 

प्रिया केरला त्रिचुरमा बस्छिन्। उनका बुवा केन्द्रीय अन्तःशुल्कमा काम गर्छन् भने आमा गृहिणी हुन् । सानो परिवार रहेको उनको घरमा उनी, उनका बुवाआमाका अलावा दाजुभाइसमेत छन् । उनी केरलामै बीकम गर्दै छिन् ।

 
भिडियो भाइरल बनेपछि १८ वर्षीय यी युवतीलाई फेसबुकमा १२ लाख बढीले फलो गरिसकेका छन् ।

एजेन्सीबाट