अघिल्लो संसदमा दर्ता एक दर्जन बढी विधेयक अब शुरुकै प्रक्रियाबाट पेश गरिनुपर्ने संसद सचिवालयका अधिकारीहरूले बताएका छन् ।

निर्वाचन आयोगले प्रतिनिधिसभाको नतिजा राष्ट्रपतिसमक्ष बुझाएको ३० दिनभित्र संघीय संसदको बैठक आह्वान गर्नुपर्ने संवैधानिक व्यवस्था छ ।

 

सरकारले अनुरोध गरेको मितिमा बैठक डाकिने राष्ट्रपति कार्यालयले जनाएको छ ।

 

अघिल्लो संसदमा यातनासम्बन्धी, लोक सेवा आयोगको काम, कर्तव्य र अधिकारसम्बन्धी, सामाजिक व्यवहार सुधारजस्ता करिब १५ वटा विधेयक विभिन्न चरणमा अड्किएका थिए । ती विधेयकलाई नयाँ संसदले आवश्यक ठाने शुरुको प्रक्रियाबाटै पुन ल्याउनुपर्ने संसद सचिवालयले बताएको छ ।

 

ती १५ वटै विधेयक भनेर अब सम्झिराख्नु नै आवश्यक नभएको र तिनीहरूलाई पुन नयाँ स्वरूपमा सरकारले प्रस्तुत गर्न चाहे हुने नभए अन्य विधयेकको रूपमा दर्ता हुन आउनेछन् ।

 

राष्ट्रपतिले संघीय संसद्को बैठक आह्वान गरेपछि मात्रै संसदको पहिलो बैठक बस्ने संवैधानिक प्रावधान छ । र त्यसैअनुसार समयसीमाभित्रै बैठक तोकिने राष्ट्रपति कार्यालयका प्रवक्ता कुलप्रसाद चुडालले बताए ।

 

उनले मन्त्रिमण्डल विस्तार हुँदै गरेको र ३० दिनभित्र बैठक बस्नुपर्ने प्रावधान रहेको बताए । उनले सरकारले जहिले बैठक बोलाउन भनेर राष्ट्रपतिज्यूलाई अनुरोध गर्छ त्यही दिन बोलाउने पनि जानकारी दिए ।

संसदको पहिलो बैठक निर्वाचित ज्येष्ठ सदस्यको अध्यक्षतामा बस्ने छ ।