काठमाडौं । नेपाली कांग्रेसको केन्द्रिय कार्यसमितिको बैठक आइतबार बस्दैछ । केन्द्रीय पार्टी कार्यालय ललितपुरको सानेपामा बिहान ९ बजेपछि बस्न लागेकाे हाे ।

 

उक्त बैठकबाट संघीय संसदीय दलको परिमार्जित विधान पारित गर्ने कांग्रेस प्रवक्ता विश्वप्रकाश शर्माले जानकारी दिए । शनिबार बसेको सांसदहरुको बैठकले विधानको संशोधन प्रस्तावलाई पारित गरी अनुमोदनका लागि केन्द्रीय समितिमा पठाउन सिफारिस गर्ने निर्णय गरेको थियो ।

 

त्यसपछि संसदीय दलको नेता चयनको प्रक्रिया सुरु हुने बताइएको छ । दलको नेताका लागि सभापति शेरबहादुर देउवा, महामन्त्री सशांक कोइराला, नेता प्रकाशमान सिंहकाे दाबी रहेकाे छ ।

 

महामन्त्री कोइरालाले सर्वसम्मत पाए मात्र संसदीय दलको नेता बन्ने बताए पनि दलको नेतामा देउवाले दावी नछोड्ने भएपछि देउवा र सिंहबीच प्रतिस्पर्धा हुने देखिएको हो ।