काठमाडौं । स्पेनिस लिग फुटबलमा बार्सिलोनाको र रियाल मड्रिडले विजयी भएका छन् । गएराति भएको खेलमा बार्सिलोनाले एथ्लेटिक बिल्बाओलाई २–० ले हरायो ।

बार्साका लागि पाको अल्कासेर र लियोनेल मेस्सीले एक–एक गोल गरे । जितसँगै बार्सिलोना प्रतियोगिताको २९ खेलमा अपराजित छ । यी २९ खेलमध्ये बार्सिलोनाले २३ मा जित र ६ वटामा बराबरी गरेको हो ।

 

यस्तै ला लिगाअन्तर्गतको अर्को खेलमा रियाल मड्रिडले गिरोनालाई ६–३ ले पराजित गर्‍यो । घरेलु मैदानमा भएको खेलमा रियलको लागि क्रिष्टियानो रोनाल्डोले ह्याट्रिकसहित चार गोल गरे । त्यस्तै लुकास भास्क्वेज र ग्यारेथ बेलले समान एक एक गोल गरे ।

 

सान्टियागो बेर्नाबेउमा रियलको फराकिलो जितमा रोनाल्डोले खेलको ११ औं, ४७ औं, ६४ औ र ९० औं मिनेटमा गरी चार गोल गरेका थिए । जिरोनासँगको ह्याट्रिकसँगै रोनाल्डोले करियरको ५० औं ह्याट्रिक पुरा गरे ।

 

स्पेनिस लिगकै अर्को खेलमा भियारियालले एथ्लेटिको मड्रिडलाई २–१ ले हरायो । गएरातिका खेलपछि ला लिगाको अंक तालिकामा २९ खेलबाट ७५ अंक जोडेको बार्सिलोना शीर्ष स्थानमा छ ।

 

समान खेलबाट ६४ अंक जोडेको एथ्लेटिको मड्रिड दोस्रो स्थानमा छ भने तेस्रो स्थानको रियाल मड्रिडको ६० अंक छ ।